OKB-ja ka vendosur të reduktojë stafin e saj ndërkombëtar në Rripin e Gazës me një të tretën, për shkak të përshkallëzimit të situatës së sigurisë pas rifillimit të sulmeve izraelite.
Sekretari i Përgjithshëm i OKB-së, Antonio Guterres, nuk mund të garantojë më sigurinë e personelit, deklaroi zëdhënësja e organizatës, Alessandra Vellucci.
Si pasojë, rreth 30 nga 100 punonjësit ndërkombëtarë në Gaza do të tërhiqen. Këta përfshijnë personel nga Programi Botëror i Ushqimit (WFP), Organizata Botërore e Shëndetësisë (OBSH) dhe UNICEF.
Sipas Ministrisë së Shëndetësisë të drejtuar nga Hamasi, të paktën 792 persona, kryesisht gra dhe fëmijë, janë vrarë javën e fundit nga sulmet izraelite.
Megjithëse Izraeli ka shprehur skepticizëm mbi këto shifra, OKB-ja dhe organizatat ndërkombëtare i konsiderojnë ato të besueshme.
Ndërkohë, ushtria izraelite ka shtuar thirrjet për evakuimin e banorëve nga disa zona në veri dhe jug të Gazës, përfshirë Jabalia, Beit Lahija, Khan Yunis dhe Rafah.
Po ashtu, Izraeli ka krijuar një institucion të ri, në varësi të Ministrisë së Mbrojtjes, për të organizuar largimin “vullnetar” të banorëve të Gazës drejt vendeve të treta, në përputhje me ligjin izraelit dhe ndërkombëtar./ Dw
