Zyra e Kombeve të Bashkuara për të drejtat e njeriut raportoi se gjatë gjashtë javëve të fundit në Rripin e Gazës janë regjistruar të paktën 798 vrasje pranë pikave të shpërndarjes së ndihmave humanitare.
Këto vrasje kanë ndodhur kryesisht pranë pikave të menaxhuara nga Fondacioni Humanitar i Gazës, i mbështetur nga SHBA dhe Izraeli, si dhe pranë autokolonave të tjera të ndihmave.
Fondacioni Humanitar i Gazës përdor kompani private amerikane për sigurinë dhe logjistikën e shpërndarjes së ndihmave, duke anashkaluar sistemin tradicional të OKB-së, i cili sipas Izraelit është shfrytëzuar nga militantët e Hamasit për përvetësimin e ndihmave.
Hamasi, i shpallur organizatë terroriste nga SHBA dhe BE, mohon këto akuza.
Pas vrasjes së shumë civilëve palestinezë që përpiqeshin të merrnin ndihma pranë pikave të GHF-së, Kombet e Bashkuara kanë cilësuar këtë model shpërndarjeje si “thellësisht të pasigurt” dhe në shkelje të parimeve të paanshmërisë humanitare.
Zëdhënësja e Zyrës së OKB-së për të Drejtat e Njeriut, Ravina Shamdasani, njoftoi se nga 27 maji deri më 7 korrik janë regjistruar 798 viktima, prej të cilave 615 pranë pikave të GHF-së dhe 183 përgjatë rrugëve ku kalojnë autokolonat e ndihmave.
Nga ana e tij, Fondacioni Humanitar i Gazës i quajti këto shifra “të pasakta dhe të keqinterpretuara” dhe mohoi se viktimat janë shkaktuar në pikat e tij të shpërndarjes. Sipas zëdhënësit të GHF-së, incidentet më të rënda janë regjistruar pranë autokolonave të OKB-së dhe se bashkëpunimi i organizatave humanitare do të mund të ulte ndjeshëm dhunën.
Ushtria izraelite po heton numrin e lartë të viktimave dhe ka ndërmarrë masa për të minimizuar përplasjet, duke vendosur gardhe dhe sinjalistika paralajmëruese dhe duke hapur rrugë alternative për autokolonat.
Raporti i OKB-së bazohet në të dhëna nga spitalet, varrezat, familjet, autoritetet shëndetësore palestineze dhe organizatat e terrenit. Shumica e plagëve të regjistruara pranë pikave të ndihmave janë nga armë zjarri.
Zyra e Kombeve të Bashkuara ka ngritur alarmin për mundësinë e krimeve të rënda në këto zona, ku njerëzit presin për ndihma jetike, dhe kërkon përgjegjësi për këto ngjarje.
Izraeli argumenton se forcat e tij operojnë pranë vendeve të shpërndarjes për të parandaluar përvetësimin e ndihmave nga militantët e Hamasit, në një konflikt që ka nisur pas sulmit të tetorit 2023.
