Analisti Mustafa Nano është rikthyer edhe njëherë të flasë për tekstet e këngëve hip-hop, por kësaj radhe për reagimet ndaj monologut të tij të mëparshëm.
Sipas tij, njerëzit që thonë se po përçan shqiptarët, janë ata që e kanë mbytur gjuhën shqipe me shprehi serbe.
Analisti shprehet, se këto persona duhet të punojnë, që të deserbizojnë shqipen e tyre.
Nano bie dakord me faktin se kosovarët po bëjnë me të vërtetë muzikë të mirë.
Këtu ai përmend këngën “Ushtari i rrugës”, për të cilën thotë se ia vlen ta dëgjosh.
Kjo këngë sipas tij ka fraza të bukura, mesazhe edukative dhe patriotike.
Monologu i plotë
Kam ndjekur me vëmendje reagimet ndaj monologut tim të fundit mbi tekstet e hip-hopit kosovar. Dhe jam kapur në befasi. Kanë qenë reagime të çuditshme.
“Mos përça shqiptarët”, thoshin disa, që janë më vulgarë sesa tekstet që unë kritikoj. “Mos i përça shqiptarët!!!” Janë të njëjtët njerëz të cilët prej muajsh më quajnë renegat, tradhëtar, serbofil, serboman, e nuk lënë fjalë tjetër të ndyrë pa thënë në adresën time, ngaqë kam zgjedhur për titull të programit tim termin Provokacija. Përfytyroni se çfarë mund t’i quaj unë këta njerëz, nëse do të shtija në punë logjikën e tyre. Unë thjesht një term kam zgjedhur, ndërsa ata kanë bërë shumë më tepër. E shumë më keq. Gjithnjë, me logjikën e tyre. Ata e kanë dëmtuar në strukturë shqipen e tyre, e kanë përmbytur me forma e shprehi serbe. Shprehjet “një muj ditë, “kjo gjë nuk vihet në pyetje”, etj, janë struktura serbe. Ka pafundësisht të tilla. Përsëris, për mua nuk ka asnjë problem, por me metrin e tyre këta janë renegatë e tradhëtarë. Por në fakt nuk janë të tillë. Janë thjesht idiotë. E meqë ra fjala, duhet të punojnë pak me shqipen e tyre, s’ka gjë se janë idiotë. Duhet ta deserbizojnë shqipen që flasin. Në vend që të harxhojnë kohë duke më sharë mua, e të tjerë si unë, le të merren pak me derbizimin e shqipes së tyre. Dhe të kuptohemi, qëllimi në vetvete nuk është deserbizimi i gjuhës. Jo, është pastrimi i shqipes prej formash e shprehish të huaja, e sidomos prej huazimeve që kanë të bëjnë me strukturën e thelbin e gjuhës. Dhe të folmet vernakulare të Kosovës janë plot me huazime të tilla. Dhe janë këto të folme që përdoren në tekstet e këngëve të reperëve kosovarë.
Ka edhe një reagim të dytë: “Muzika kosovare është më e mira”, thoshin disa. Por në këtë pikë unë bie dakord. Kosovarët janë duke bërë me të vërtetë muzikë shumë të mirë. Më të mirën. Dhe ja një shembull: Kënga Jam ushtari i rrugës. Po ju ftoj që ta dëgjojmë së bashku. Sepse është një këngë që ia vlen të dëgjosh. Edhe shqipja është normale. Por edhe frazat janë të bukura, mendimet e shprehura janë të thella e mesazhet që përcillen janë pozitive, edukative e patriotike.
Analisti Mustafa Nano një javë më parë në emisionin e tij “Provokacija”, i kushtoi një monolog teksteve të reperëve shqiptarë, të cilët i quajti vulgare.
