Coronavirusi ka prekur deri tani më shumë se 45 vende, ku janë shënuar më shumë se 81 000 persona të infektuar dhe mëse 2 760 viktima.
Nga këta, më shumë se 40 viktima janë identifikuar jashtë Kinës, teksa 29 viktima janë regjistruar brenda 24 orëve, numri më i ulët në gati një muaj, kurse numri i të infektuarve tashmë është më i lartë jashtë shtetit kinez.
Pas Kinës, vendet më të prekura janë: Koreja e Jugut, vendi i dytë me 1 600 raste dhe 12 viktima, Irani 26 viktima për 245 raste të raportuara, Italia, mbi 500 raste të identifikuara dhe ka 14 vdekje.
Në fillim të kësaj jave, Organizata Botërore e Shëndetit paralajmëroi se ndodhemi në prag të një pandemie, teksa ditën e sotme Drejtori i Përgjithshëm i OBSH vlerësoi se epidemia e Coronavirusit ka arritur në një “pikë vendimtare” dhe u bëri thirrje vendeve të veprojnë “me shpejtësi” për të frenuar virusin shumë të rrezikshëm.
“Ne jemi në një kohë vendimtare. Nëse veproni në mënyrë agresive tani mund ta kufizoni këtë koronavirus. Këshillat e mia janë të veproni shpejt, ” tha Tedros Adhanom Gebrejesus në një konferencë për shtyp.
Tedros bëri me dije se shqetësimi më i madh i organizatës tani është ajo që po ndodh në pjesën tjetër të botës, me më shumë se 3,470 raste të infektuara në 44 vende, ku në 24 orët e fundit, shtatë vende, përfshirë Brazilin dhe Norvegjinë, kanë regjistruar rastet e tyre të para të infeksionit.
Kështu, shefi i OBSH-së u bën edhe një herë thirrje vendeve të veprojnë shpejt, të përgatiten për t’u marrë me epideminë, edhe pse nuk kanë raste të infektuara.
Ai shtoi se disa vende nuk kishin regjistruar një rast të vetëm për më shumë se dy javë, të tilla si Belgjika, Kamboxhia, India, Rusia dhe Vietnami.
“Secila prej këtyre vendeve është e ndryshme, dhe secila tregon se masat agresive dhe të hershme mund të parandalojnë transmetimin përpara se virusi të bëhet i fortë,” tha Gebrejesus.
Në mesin e këtyre vendeve renditet edhe Shqipëria, ku përveç disa rasteve të dyshuara, fatmirësisht nuk është regjistruar asnjë i prekur, teksa kryeministri Edi Rama ka mbledhur sot Komitetin Kombëtar të Sigurisë, pjesë e të cilës ishin ministra dhe zyrtarë të tjerë , ku temë diskutimi ishin masat e marra kundër Coronavirusit.
Rama mbledh Komitetin Kombëtar të Sigurisë, tregon se ku do të ngrihet karantina
