Ditën e sotme ka dëshmuar përpara krimeve të rënda, Ahmet Ajeti, shtetasi kosovar, i cili akuzohet për atentatin ndaj ish-kreut të Bandës së Durrësit, Lulzim Berishës.
Ajeti ka nisur rigjykimin pas dënimit në mungesë më 20 vjet për “Tentativë vrasje”, shkruan “Balkanweb”.
Në dëshminë e tij përpara togave të zeza, kosovari është shprehur se e kishin kërcënuar për të kryer vrasjen, por ai nuk kishte pranuar.
Sipas Ajetit, në 2005-ën kishte ardhur për punë në Shqipëri, së bashku me Osman Karpuzin.
Disa persona i kishin strehuar tek hoteli i tyre në Durrës, ndërsa i kishin thënë se duhet të vrisnin personin në foto, i cili ishte Lulzim Berisha.
“Në gusht të vitit 2005 erdha në Shqipëri pasi kërkoja punë. Erdha bashkë me Osman Karpuzin të cilin e njihja që nga viti 2001. Osmanin e kam njohur në luftën Kombëtare të Maqedonisë. U ndalëm fillimisht në Tiranë tek një ndërtesë. Aty takuam dy persona të cilët na thanë se mund të na siguronin punë. Por puna ishte në Durrës. Udhëtuam drejt Durrësit dhe na vendosën në hotel atje. Dy personat na thanë që ishte hoteli i tyre. Të nesërmen ata erdhën prapë dhe na sollën një armë bashkë me një fotografi. Na thanë këtë personin duhet ta vrisni. Më shumë biseduan me Osmanin”, është shprehur Ajeti.
Ndër të tjera ai rrëfeu se është vetëplagosur në bark, ndërsa policisë i ka thënë se ka bërë sherr me disa persona.
Më tej Ajeti shton, se personat që i kishin strehuar, u kishin thënë se pa bërë vrasjen nuk kanë shpëtim.
Pas vetëplagosjes tregon kosovari, dy personat i kishin shkuar në spital dhe i kishin thënë se nëse fliste, nuk do ta shihte më vëllanë.
“Por ne nuk donim të bënin vrasje. Ata na thanë s’keni shpëtim pa kryer veprën penale. Atëherë vendosa të vetësakrifikohesha. Kur Osmani doli për të blerë cigare unë mora armën dhe në hyrje të ndërtesës u vetëplagosa në anën e majtë në bark. U vetëplagosa pasi nuk doja të kryerja vrasje. Unë kisha ardhur në Shqipëri pasi jam kryefamiljar dhe vëllain e kam invalid të luftës. Në spital erdhën dy personat dhe më thanë që nëse flet vëllain nuk do ta shikosh më. Më mori policia në pyetje, na ka ruajtur një polic në një shtëpi. Policisë i thashë që jam përplasur në një sherr banal me disa persona dhe më plagosën. Na ka shoqëruar polici që na ruante deri në dalje të Durrësit dhe ne u larguam”, vijon Ahmet Ajeti.
