Nuk kanë fund telashet për linjën e autobusëve ‘Green Line’ në Tiranë. Që kur kanë hyrë në qakullim këto autobusë janë përfshirë në aksidente të shumta. Paraditen e kësaj të diele një autobus është aksidentuar në rrugën “Ferid Xhajko” afër 5 Majit, ku ka dalë nga rruga dhe është përplasur me një pemë dhe motomjet të parkuar. Policia bën me dije se shkak është bërë shoferi i autobusit, të cilit i ka rënë të fikët.
Kjo linjë u pompua si një sukses i madh nga kryebashkiaku i Tiranës, Erion Veliaj, linjë e cila zotërohet nga Nadir Çausholli.
Ndërkohë në lidhje me këtë aksident ka reaguar edhe kreu i Nismës “Thurje”, Endri Shabani, i cili është edhe anëtar në Këshillin Bashkiak të Tiranës, duke kërkuar që urbanët ti rikthehen publikut.
Shabani argumenton se aksidentet e linjës “Green Line”, tregojnë që privati nuk garaton dot jo vetëm cilësinë e shërbimit por as sigurinë e jetës së qytetarëve të Tiranës. Ai deklaron se nesër do t’i kërkojë zyrtarisht Këshillit Bashkiak dhe kryetarit të bashkisë anullimin e kontratës me operatorin privat që menaxhon linjën e unazës.
Reagimi i Endri Shabanit:
Boll më! Koha për t’ia rikthyer urbanët publikut!
Linja e unazës i është dhënë monopol një operatori privat, me argumentin se e menaxhon më mirë se bashkia.
Sot, për të disatën herë autobuzët e kësaj linje shkaktuan një aksident tjetër në mes të Tiranës.
Është e njëjta linjë që i hodhi qytetarët në Lanë.
Është po e njëjta linjë që mori përpara makinat e parkuara në semafor tek parku rinia.
Është po e njëjta skenë me urbanët privat që marrin përpara tabelat e reklamave, stacionet e autobuzëve apo makinat e qytetarëve.
KJO DUHET TË MARRË FUND!
Pavarësisht shkakut real, apo justifikimit që jepet në media, këto aksidente tregojnë që privati nuk garaton dot jo vetëm cilësinë e shërbimit por as sigurinë e jetës së qytetarëve të Tiranës!
Prej tre vitesh si Nisma Thurje kemi kërkuar inspektimin e këtyre autobuzëve urban, apo raportet e kontrollit teknik nga Drejtoria e Shërbimit Rrugor, por ka patur zero transparencë.
Prandaj nesër do t’i kërkoj zyrtarisht Këshillit Bashkiak dhe kryetari të bashkisë anullimin e kontratës me operatorin privat që menaxhon linjën e unazës.
Ta nisim nga kjo linjë, si hap i parë, për tu shkëputur nga ky model abuziv në të gjitha linjat urbane, dhe për t’i ofruar Tiranës një transport publik.
