Anëtari i Gjykatës së Lartë, Ardian Dvorani, i dha dje përgjigje Këshillit të Lartë Gjyqësor, për letrën e presidentit Ilir Meta, i cili kërkonte shkarkimin e tij.
Dvorani nëpërmjet një letre drejtuar KLGJ, tha se Meta duhet të jetë më i përmbajtur.
Ai gjithashtu shtoi, se KLGJ nuk ka kompetencë të shqyrtojë çështjen e mandatit të tij.
Ndërkohë ditën e sotme, KLGJ është mbledhur për të shqyrtuar kërkesën e presidentit.
Me shumicë votash u vendos që Dvoranit t’i vihen në dispozicion dokumentet për procedurën e ndjekur për emërimin e 3 gjyqtarëve në Gjykatën e Lartë, shkruan “abcnews.al”.
KLGJ me shumicë votash, vendosi që për këtë çështje duhet të pritet edhe mendimi i partnerëve të huaj.
Kujtojmë këtu se Meta nëpërmjet një kërkese në KLGJ më 10 prill, kërkoi që Dvoranit t’i ndëprehet mandati, pasi i ka përfunduar dhe në kushtet kur janë emëruar 3 anëtarë të rinj, ai duhet të largohet.
Përplasja mes Metës dhe Dvoranit nisi për shkak të emërimeve në Gjykatën Kushtetuese, ku kreu i shtetit e akuzon kreun e KED për bashkëpunim me maxhorancën dhe manipulim të listave.
