Pas konsultimeve deri natën vonë, liderët evropianë nuk arritën një marrëveshje për fondin e rimëkëmbjes.
Drejtuesit e shteteve të veriut, Holanda, Suedia, Danimarka, Austria dhe Finlanda u përpoqën në samitin e Bashkimit Evropian për të ndryshuar dy temat kryesore që kanë të bëjnë me çështjen e burimeve të Fondit të Rimëkëmbjes dhe Buxhetit për vitet 2021-2027.
”Këto përpjekje janë kundërshtuar gjithmonë, madje edhe me ndërhyrjen e kancelares gjermane Angela Merkel. Mendimi i përgjithshëm është se këta liderë po përpiqen të prishin samitin, por për të mos ekspozuar veten dhe për të fajësuar të tjerët, ata duan që dy çështjet madhore për të cilat është mbledhur samiti t’i shmangin duke ngritur çështjen e sundimit të ligjit, sigurisht një motiv më fisnik para syve të opinionit publik”, raportojnë mediat ndërkombëtare.
Kur kryeministrja daneze, Mette Frederiksen u përpoq ta largonte vëmendjen nga këto dy çështje duke pyetur se “pse nuk ka ardhur askush këtu sonte për të folur për shtetin e së drejtës”, kancelarja Merkel heshti duke afirmuar kështu se askush mund ta akuzonte atë për braktisjen e shtetit të së drejtës.
Samiti do të vazhdojë sot, në orën 16:00, ndërkohë që presidenti i Këshillit Europian, Charles Michel, pritet të paraqesë një propozim të ri, që do të bazohet në dhënien e një granti prej 390 miliardë eurosh, por me zbritje nga ai i mëparshmi. Projekti fillestar përfshinte 500 miliardë euro, por u konsiderua i papranueshëm nga Holanda, Austria, Suedia dhe Danimarka dhe Finlanda.
