Kriza që ka përfshirë botën dhe vendin tonë prej pandemisë së koronavirusit, duket se është edhe arsyeja që ka bllokuar edhe tregun e shit-blerjes së naftës bruto.
Kjo krizë ka përfshirë edhe kompanisë e nxjerrjes së naftës “Albpetrol” e cila ditët e fundit ka anuluar një tjetër ankand për shitje të naftës bruto pasi nuk kishte marrë asnjë ofertë.
Në ankandin e fundit, kompania “Albpetrol” ishte përgatitur që të shiste 20 mijë tonë naftë bruto, por si rrjedhojë e mungesës së ofertuesve procedua është anuluar.
Vetë Ministria e Infrastrukturës dhe Energjisë e sqaroi menjëherë këtë anulim, përmes një publikimi të shkurtër zyrtar, referuar arsyeve të dhënë nga Albpetrol.
“Autoriteti shitës, Albpetrol sh.a njofton anulimin e procedurës të ankandit ‘Procedurë e hapur’, me objekt ‘Shitje nafte bruto, sasia 20 000 ton’, zhvilluar më datë 03.11.2020, ora 11.00, pranë ambienteve të MIE, për mungesë konkurrence, pasi nuk u paraqit asnjë ofertë, bazuar kjo në pikën 15, të urdhrit Nr. 83, datë 10.02.2012 ‘Për rregullat dhe procedurat e shitjes të produkteve hidrokarbure’, i ndryshuar”,- thuhet në njoftimin e MIE-s.
Në korrik të këtij viti kompania “Albpetrol” shiti nëpërmjet ankandit 48 mijë tonë naftë bruto tek kompania “Allum Enterprises”, për një vlerë rreth 10 milionë euro.
Edhe ankandi i korrikut i “Albpetrol” u realizua me sukses vetëm pas një sërë tentativash të pasuksesshme, të zhvilluara gjatë periudhës mars-maj, kohë kur vendi ishte në karantinë.
Pas këtij ankandi “Albpetrol” do të deklaronte se, kjo vinte në një moment të rëndësishëm për kompaninë.
Por si pasojë e krizës botërore prej koronavirusit, ka rënë ndjeshëm konsumi i naftës dhe kjo ka ndikuar edhe në uljen e çmimeve si në bursa, ashtu edhe në tregun e pakicës që prek direkt konsumatorët.
Kjo kërkesë pritet të mbetet e dobët edhe në fillim të 2021, ndërkohë që masa kufizuese pritet të shfaqen edhe përtej kontinentit europian në vende si SHBA-të apo rajone të ndryshme.
Në shtator-tetor konsumi i naftës ra me 5% në raport me të njëjtën periudhë para pandemisë edhe pse shënoi një përmirësim dramatik, po të kemi parasysh që në prill kërkesa ishte 20% më e ulët në raport me një vit më parë.
/GazetaReforma.com/
