Ditën e sotme, disa anëtarë kryesie të PD-së zyrtare kanë nisur lëvizjet, pasi miratuan datën e zgjedhjeve për kreun e PD-së. Një ndër ta është plotësimi i vakancave në degët pa kryetar. Ndërkohë që kreu i Grupit Parlamentar të Partisë Demokratike zyrtare, Gazment Bardhi dha një deklaratë për mediat pasi mblodhi grupin e tij. Bardhi tha në një prononcim për mediat se nuk ka firmosur dhe nuk do të firmosë asnjë vendim kundër statutit. Sipas tij, një grup brenda Partisë Demokratike po kërkon që të ushtrojë detyrën e Sekretarit të Përgjithshëm.
“Unë nuk di pse është zëvendësuar njëri apo tjetri, nuk kam firmosur asnjë vendim dhe nuk do firmos asnjë vendim që bie ndesh me statutin. Unë nuk do të jap detaje të zbatimit të statutit. Nuk kam dijeni për një propozim të tillë. Organizimi i PD-së është përgjegjësi e sekretarit të përgjithshëm. Mesa duket një grup kanë vendosur të ushtrojnë kompetencat e sekretarit të përgjithshëm. Unë do të zbatoj statutin e PD-së. Çdokush tjetër që ka vendosur të ecë përpara në procese anti statutore bën zgjedhjet e tij. Pa statut dhe pa rregulla nuk mund të ketë bashkëjetesë”, u shpreh kreu i Grupit Parlamentar të Partisë Demokratike të vulës Gazment Bardhi.
