Largimi i Panuccit mesa duket ka qenë në tavolinë dhe këtë e vërteton vet Presidenti i Federatës Shqiptarë të Futbollit, Armand Duka.
Pas shkarkimit të trajnerit të Kombëtares, Duka ka shpjeguar arsyet që kanë çuar deri në marrjen e këtij vendimi.
Sipas tij ky mund të ishte vendim i marrë më herët, por problemi qëndronte tek zëvendësimi i tij, megjithatë Duka thotë se si trajner ai nuk e motivonte më skuadrën kështu që kishte ardhur koha që të prishej marrëdhënia kontratuale që kishin.
“Ishte një vendim që mund të ishte marrë edhe më herët, por nuk kishim kohë për të gjetur një trajner të ri. E takova pas ndeshjes, i shpjegova se situata është e vështirë dhe se ai nuk mund të motivonte më lojtarët, kështu që ndërpremë bashkëpunimin. Megjithatë, Panucci ka punuar në Shqipëri dhe unë duhet ta falënderoj për këtë bashkëpunim”, tha presidenti.
Mirëpo në gjatë së premtes një emër i njohur i futbollit qëndronte në tribunën “VIP”, të stadiumit “Loro Boriçi” dhe bëhet fjalë për ish-trajnerin e disa skuadrave të Serie A, Edy Reja, kështu që u përfol për një bashkëpunim të mundshëm, por kjo është mohuar nga presidenti Duka.
Nuk kam njohje me Edy Rejan, e takova rastësisht në tribunat VIP dhe më tha se kishte ardhur për të vëzhguar futbollistët e të dyja skuadrave, por pa pasur objektiv për të qenë trajner i Kombëtares shqiptare. Kemi pasur oferta të shumta, siç ndodh në raste të tilla, por në këtë moment duhet të mendojmë për ndeshjen me Andorrën”, tha Armand Duka.
