Ish-kryebashkiaku i Durrësit, Vangjush Dako do të merret në pyetje nga prokuroria në ditët në vijim, shkruan “Abcnews”.
Dako do të japë dëshminë në lidhje me përgjegjësitë e tij, në shembjen e banesave në Durrës, gjatë tërmetit të 26 nëntorit.
Grupi i ekspertëve ka dalë në përfundimin se cilësia e ndërtimeve ka qenë e dobët.
Bashkia e Durrësit është organi, i drejtpërdrejtë, i cili mban përgjegjësi për lejet e ndërtimit, të cilat kanë rezultuar me abuzime të shumta.
Ditën e tërmetit, Dako kalonte i pashqetësuar me makinën e tij luksoze “Range Rover”, në banesat e shembura, nga ku nxirreshin kufomat e njerëzve.
Kujtojmë këtu se në Durrës humbën jetën plot 23 persona.
Ndërkohë ditën e sotme, 9 të arrestuarit, si përgjegjës për shembjen e banesave, kanë dalë përpara trupit gjykues.
Prokuroria në kuadër të hetimeve lëshoi 17 urdhër-arreste.
Nëntë prej tyre u ekzekutuan, ndërsa 8 persona janë në kërkim dhe dyshohet se mund të jenë arratisur jashtë vendit.
