Teksa numri i të infektuarve në vendin tonë ka shkuar në 33 dhe është shënuar viktima e parë, mjekët janë kthyer në heronjtë e këtyre ditëve me këshillat dhe optimizmin që i japin situatës.
Sokol Peçnikaj, mjek në Spitalin e Durrësit, në një intervistë për ABCNews, tha se një person i prekur me Coronavirus mund të infektojë deri në 50 persona të tjerë, duke iu bëri thirrje qytetarëve që të qëndrojnë brenda.
“Sot paradite kemi qenë në punë, tani jemi në shtëpi. Po respektojmë rregullat. Duhet të minimizohen pasojat. Ne shkuam në punë me dokumentet e mjekut. Të gjithë të tjerët janë të izoluar ose me maska. Mjekimi për emergjencën vijon ndërsa interventet janë pezulluar. Puna jonë është e jashtëzakonshme. Spitali është i mbyllur për të gjithë ata që s’kanë punë me spitalin. Kjo është e papërjetuar ndonjëherë, por duke parë Kinën dhe Italinë duhet të jemi më optimistë. Ne mjekët reanimatorë jemi në majën e luftës. Të gjithë këta persona me të cilët ne merremi, ndaj i bëjmë thirrje popullatës të ruajnë higjienën. Infektimi mund të shkojë në 1 me 50. Të mbyllen hundët me maska. Punojini vetë maskat. Mos bëni grumbullime të mëdha njerëzish”, u shpreh Sokol Pecnikaj, mjek reanimator në spitalin e Durrësit.
Ditën e sotme u raportua se mjeku që i kishte shërbyer viktimës 73-vjeçare ishte infektuar nga COVID-19.
I pyetur rreth kolegut të tij, Pecnikaj tha se e njëjta situatë u krijua dhe në vendet e tjera dhe personeli mjekësor është i rrezikuar.
“Edhe në vendet e tjera personeli mjekësor është i rrezikuar i bëjmë thirrje ekipit, sanitarëvë dhe policëve të marrin masat dhe organet drejtuese të pajisin me maska. Masat e domosdoshme i kemi, maska doreza po, por veshjet speciale janë vetëm për raste të jashtëzakonshme.”-tha mjeku.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës
