Ka filluar manifestimi i shumëpërfolur i organizuar nga presidenti Ilir Meta, ku ashtu sikurse ishte premtuar qytetarët gjenden para Kryeministrisë, teksa mbajnë në duar Kushtetutën, flamuj dhe mimoza.
Në bulevardin “Dëshmorët e Kombit” është vendosur një foltore dhe një tavolinë, mbi të cilën qëndron një dekret i mbuluar dhe përmbatja e tij nuk dihet.
Pak më parë, zëdhënësi i presidentit Tedi Blushi ka paralajmëruar firmosjen e një dekreti live, bërjen e një votimi si edhe shpalljen e një betimi, por nuk dihet për çfarë bëhet fjalë.
Protestës i është bashkuar edhe Aleanca për Mbrojtjen e Teatrit që kanë marshuar bashkë me protestuesit drejt bulevardit.
Në protestë janë parë edhe prindër me fëmijët e tyre në karroca.
Ndërkohë pak metra larg vendit ku po zhvillohet protesta, në krah të godinës së Kryeministrisë gjenden një numër i madh furgonash të Forcave të Ndërhyrjes së Shpejtë, ndërsa në bulevard janë vendosur kamera sigurie me rezolucion të lartë, kurse shtyllat janë lyer me graso për të mos lejuar prishjen e tyre.
Pak para fillimit të protestës Komandanti i Gardës së Republikës Gramos Sako ka zbritur në terren për t’i dhënë direktivat e fundit efektivëve.
Momentalisht, figura të ndryshme politike dhe jo vetëm po mbajnë fjalën e tyre para protestuesve, teksa pritet çfarë ka për të thënë presidenti dhe për çfarë bën fjalë dekreti për të cilin ka folur.
