Sot është anuluar mbledhja e Komisionit të Mandateve. Menjëherë pas këtij vendimi, Kuvendi ka lajmëruar SPAK. Anulimi i mbledhjes erdhi pasi Bllako e dorëzoi vetë kërkesën për dorëzimin e mandateve, duke thënë se do të përballet i vetëm përpara ligjit.
Ndërkohë që ka ardhur një reagim nga Enkelejd Alibeaj i cili e ka konsideruar si antikushtetuese vendimin e kryetares së Kuvendit për të anuluar mbledhjen e Këshillit të Mandateve, pas kërkesës së SPAK, ku kërkoi arrestimin e deputetit Alqi Bllako.
Alibeaj tha në një konferencë për shtyp nga Kryesia e Kuvendit se me vendimin për të anuluar mbledhjen përgjigja për SPAK mbetet pezull.
Gjithashtu Alibeaj u shpreh se përfaqësuesit e opozitës kanë kërkuar që mbledhja e Këshillit të Mandateve të zhvillohet, pavarësisht se deputeti Alqi Bllako dorëzoi mandatin. Sipas tij Kuvendi duhet të shqyrtojë kërkesën e SPAK dhe vetëm në këtë mënyrë nuk bëhet pengesë për hetimet.
“Kuvendi ka vendosur anulimin e mbledhjes së Këshillit të Mandateve. E çuditshme! E padëgjuar, në shkelje të kushtetutës, rregullores dhe kompetencave të kryetarit të Kuvendit. Nga momenti që kryetari i Kuvendit thërret këshillin, kompetenca i kalon pikërisht këtij këshilli. I duhet atij të mblidhet dhe te shqyrtojë kërkesën e Spak. Dhe në bazë të kërkesës është këshilli ai që vendos. Këshilli i Mandateve ka një kërkesë që është pezull, qëndron në dyert e këtij kuvendi dhe pret një përgjigje. Pa këtë përgjigje ka një mangësi procedura e mëtejshme. Vetëm në këtë mënyrë Kuvendi nuk bëhet pengesë për hetimet. Deputetët të maxhoranës dhe opozitës kanë të drejtë që ndaj kësaj kërkese të prokurorisë të kërkojnë informacion. Nëse këshilli do të mblidhet ne kemi bërë një kërkesë, ka ca çështje që duhet të sqarohen, të cilat kanë dalë publikisht në bazë të punës së lavdërueshme të komisionit hetimor”, u shpreh Alibeaj.
