Kryeministri Edi Rama, nga Vlora paralajmëroi një reformë në Policisë së Shtetit, e cila ishte parashikuar për në shtator, kohë kur pritet dhe ndryshimi i qeverisë dhe mbledhja e parlamentit të ri, por që me sa duket do ndodhë së shpejti.
Pas mbledhjes së asamblesë së degës së PS, Rama kërkoi mirëkuptimin e gazetarëve për t’u larguar pasi kishte thirrur ministrin e Brendshëm, Bledi Çuçin dhe drejtuesit e policisë për të lancuar një fazë të re të ristrukturimit. Rama tha se është e mira që ky proces të përshpejtohet.
“Do ju kërkoj ndjesë për t’u larguar sepse kam thirrur ministrin e brendshëm dhe disa nga drejtuesit e policisë për të mos humbur kohë, për të lançuar sa më shpejt një fazë të re të ristrukturimit, që është përgatitur por që për arsye të mirëkuptueshme është momenti të përshpejtohet me disa javë dhe të mos presim fundin e verës”, deklaroi kryeministri Edi Rama.
Kujtojmë se ngjarjet e rënda kriminale kohët e fundit janë bërë të shpeshta në vendin tonë. Jo më larg se pak pas mesnatës ndodhi një ngjarje e rëndë në bregdetin e Velipojës, ku katër persona u vranë me armë zjarri dhe dy të tjerë mbetën të plagosur rëndë. Të vdekur kanë mbetur biznesmeni Kujtim Ferracaku, babai i Arjan Ferracakut të ekzekutuar në Shkodër tre vite më parë. Po ashtu kanë humbur jetën dy pjesëtarë të familjes Gocaj, Xhovano dhe Edmond Gocaj, si dhe punonjësi i shezlongëve Myzerim Zeneli. Ndërkaq të plagosur kanë mbetur dy shtetas të tjerë, Hasan Ferracaku, vëllai i të ndjerit, si dhe Elmedin Dyli.
