Një ngjarje e rëndë është regjistruar në aeroportin e Rinasit, ku është ndaluar një mësues 55-vjeçar në përpjekje për t’u larguar nga vendi.
Bëhet fjalë për Fatmir Hoxhën, mësues në shkollën 9-vjeçare “Ali Hana” në fshatin Rrajcë Skënderbej, bashkia Përrenjas, ndaj të cilit rëndojnë akuza për përndjekje dhe ngacmim seksual ndaj dy nxënëseve të mitura, të moshave 13 dhe 14 vjeç.
Burime zyrtare nga Policia e Librazhdit bëjnë me dije se ndalimi u krye me iniciativë të strukturave vendore, pas dy kallëzimeve të bëra nga familjarët e vajzave.
Sipas hetimeve paraprake, ngjarjet janë përsëritur në mënyrë të vazhdueshme gjatë muajve të fundit, duke shkaktuar ankth dhe frikë te të miturat dhe familjet e tyre.
Pas depozitimit të kallëzimeve, Hoxha është larguar nga fshati dhe ka tentuar të arratiset jashtë Shqipërisë, por është kapur në Rinas, ku ndaj tij është ekzekutuar masa e ndalimit.
Banorët e zonës kishin ngritur më herët shqetësime lidhur me sjelljen e tij, ndërsa tashmë çështja është marrë seriozisht nga autoritetet. Policia ka sekuestruar disa prova të cilat dyshohet se mbështesin akuzat për ngacmim seksual.
Hetimet vijojnë për dokumentimin e plotë të rastit dhe mbledhjen e provave ligjore, ndërkohë që dosja është në ndjekje nga Prokuroria e Rrethit Gjyqësor Elbasan.
Ndaj të ndaluarit do të merren masat përkatëse në përputhje me legjislacionin penal në fuqi.
