Doloreza Musabelliu mori sot mandatin nga KLP për t’u bërë pjesë e SPAK.
Për 9 vite pa të drejtë riemërimi, Musabelliu do të jetë pjesë e Prokurorisë së Posaçme, duke e çuar në 11 numrin e përgjithshëm.
Doloreza Musabelliu e ka kryer Shkollën e Magjistraturës në vitet 2002-2005 dhe më pas është emëruar në Prokurorinë e Krimeve të Rënda, duke qenë pjesë e këtij organi prej 14 vitesh.
Më datë 5 dhjetor 2019, ajo u konfirmua në detyrë nga Komisioni i Pavarur i Kualifikimit
Përsa i përket deklarimit të pasurisë, në 2004-ën, Musabelliu nuk deklaronte asgjë, ndërsa në fund të vitit 2017, pasuria e saj llogaritet në 17.5 milion lekë, me një rritje prej 1.3 milion lekësh.
Të ardhurat familjare për periudhën deklaruese llogariten në 20.9 milion lekë, ku 83% burojnë nga paga e Musabelliut, ndërsa pjesa tjetër nga aktiviteti i bashkëjetuesit si noter.
Të vetmit “flamuj të kuq”, që u identifikuan ishin kursimet në cash dhe blerja e një apartamenti nga bashkëjetuesi i saj, nëpërmjet një huaje të marrë nga i ati.
Doloreza Musabelliu quhet ndryshe edhe “gruaja e hekurt”, pasi dërgoi për herë të parë në gjykatë dosjen e Emiljano Shullazit dhe grupit të tij.
Ajo ka hetuar edhe rrëzimin në grykëderdhjen e lumit Ishëm të avionit të drejtuar nga Guido Guidi, por që nuk u vërtetua asnjëherë nëse përdorej për trafik droge.
Musabelliu ka pasur në dorë edhe dosjen “Toyota Yaris” me miliona eurot e sekuestruara në Durrës.
Gjithashtu ajo ka urdhëruar sekuestrimin e 4 milion eurove të biznesmenit të hidrosanitareve, Nikolin Jana, pas urdhër-arrestit ndërkombëtar të ardhur nga Spanja.
Deri në vitin 2017, ajo ka drejtuar njësin Anti-Korrupsion në Prokurorinë e Krimeve të Rënda.
Më pas drejtuesi i atëhershëm i Krimeve të Rënda, Besim Hajdarmataj, e kaloi si prokurore të thjeshtë të këtij organi.
