Kryeministri Edi Rama ka vijuar me prezantimin e programit të qeverisë për këtë mandate të tretë. Në fjalën e tij në parlament, Rama ka thënë se në shkolla do të hyjnë programet për artin dhe sportet dhe mësimi i gjuhës angleze do të fillojë që nga klasa e parë. Rama është ndalur edhe tek menaxhimi i mbetjeve dhe paralajmëroi bashkitë, duke thënë se pasrtërtia duhet të kthehet në kryefjalën e çdo qeverie vendore dhe çdo kryebashkiaku.
“Fëmijëve do iu përkushtohemi me një ofertë të re, ndërsektoriale, një pjesë e vogël të së cilës është nisja e anglishtes që nga klasa e parë. Programet për artet dhe sportin do të hyjnë në programin e shkollave, me libra cilëson të shtëpive prestigjioze dhe falas. Do t’i mbështesim kujdestarët publikë të fëmijëve tanë, qoftë në aspektin profesional dhe financiar. Do të investohemi fuqimisht. Në fillim pastërtia, pastaj gjitha të tjerat. Rritja e konsumit, e veprimtarisë ndërtimore, s’mund të rritet me nivelin e papastërtisë. Bashkisë që nuk pastrojnë dhe nuk menaxhojnë plehrat, s’do të përfitojnë asnjë grant nga buxheti i shtetit. Pastërtia duhet të kthehet në kryefjalën e çdo qeverie vendore dhe çdo kryebashkiaku”, tha Rama.
Ndër të tjera, kryeministri bëri me dije se vitin tjetër do të ndalet konsumi i qeseve plastike dhe prodhimi shitja, do të sanksionohen me zero tolerancë.
“Në qershor të viti tjetër do të ndalet konsumi i qeseve plastike. Ato janë vrasëse të mjedisit. Prodhimi, shitja, do të sanksionohen me zero tolerancë. Nuk jemi të parët që e bëjmë, por jemi të parët që duhet ta kishim bërë. Do të anulohen lejet dhe licencat absurde për të ricikluar mbetje me demek të riciklueshme kazan në kazan, duke ndotur mjedisin. Mos kërkoni lëshime nga qeveria. Dita e fëmijëve, 1 qershori, do të jetë dita e çlirimit nga qeset plastike”, deklaroi Rama.
