Kuvendi i Shqipërisë është mbledhur ditën e sotme për të diskutuar “Për Gardën e Republikës së Shqipërisë”; “Për ndryshimin e emërtimit të njësisë së qeverisjes vendore”. Po ashtu në diskutim do të jetë edhe Dekreti i Presidentit të Republikës, me nr. 11981, datë 26.2.2021, “Për kthimin e ligjit nr. 15/2021 “Për disa ndryshime dhe shtesa në ligjin nr. 59/2014 “Për karrierën ushtarake në Forcat e Armatosura të Republikës së Shqipërisë””, të ndryshuar”.
Por gjatë seancës së sotme kanë qenë të shumta edhe ndodhitë. Kryetari i Kuvendit, Gramoz Ruçi ka përjashtuar nga seanca deputetin Ralf Gjoni, pasi ka marrë fjalën pa leje.
Debati:
Ruçi: Kush ta dha fjalën ty! Ulu poshtë. Të tërheq vërejtje. Po zapton foltoren!
Ralf Gjoni: Më përmende emrin, dua ta sqaroj
Ruçi: Nëqoftëse zapton foltoren, e di që përjashtohesh nga seanca.
Ralf Gjoni: Nuk më frikëson!
Ruçi: Edhe foltores edhe vendit tim i merr të keqen! Je i përjeshtuar nga seanca.
Ralf Gjoni: Nuk më përjashton dot ti nga seanca. Gramoz të lutem!
Ruçi: Vazhdo se do kërkoj masën tjetër.
Ralf Gjoni: Ti kujton se më tremb!
Ruçi: Jo mo je trim i madh ti xhanëm. Zotëri po pengon folësen, mund të vazhdosh.
Nga ana tjetër foltorja e Kuvendit është përdorur gjithashtu edhe për fushatë elektorale. Deputeti Halit Valteri ka përfituar nga rasti për të kërkuar mbështetjen duke thënë se nuk ka frikë nga burgu si presidenti apo kryetari i opozitës.
“Kam integritet, dashuri. Kurrë nuk ka pasur më kollaj vazhdimësinë. Shqipëria nuk do të ndryshojë kurs, por do të vazhdojë lokomotivën. Unë jam i vetëdijshëm që të gjithë ju do të mbështesni. Unë nuk kam frikë nga burgu, si presidenti apo kryetari i opozitës. Unë jam halit Valteri, krenar që jam matian, e nuk do pushoj së luftuari. Personalisht jam krenar që shokët e mi më kanë ndihmuar shumë, jo vetëm përmes mesazheve dhe përkrahjes por më kanë ftuar dhe në shtëpinë e tyre. Kam nevojë për ndihmën tuaj! Jam shpres plotë që do të mbështesni”, ka thënë Valteri.
