Një burrë i ka marrë jetën gruas së tij shtatzënë sot në oborrin e maternitetit në Prishtinë.
35-vjeçarja ishte shtatzënë në javët e fundit. Autori dyshohet të jetë ish-partneri i saj.
Besarta Breznica, nga Rrjeti i Grave të Kosovës, në Radio Dukagjini, ka thënë se e ndjera ishte në proces të divorcit me bashkëshortin e saj, i cili ia ka marrë jetën asaj me armë zjarri.
Klan Kosova ka rënë në kontakt me një dëshmitare e cila i ka dëgjuar fjalët e fundit të viktimës para se ajo të vritej.
“Po, më duket se ka qenë shtatzënë sepse ka bërtitur: ‘pasha këtë fëmijë që kam me lind sonte. Ai veç e ka nxjerrë alltinë prej xhepit dhe e ka qëlluar dy herë”, ka shtuar dëshmitarja.
Qendra Klinike Universitare e Kosovës ka reaguar pas vrasjes së gruas shtatzënë në oborrin e maternitetit. Përmes një njoftimi në Facebook, ShSKUK’ja, konfirmon se sonte rreth orës 18:00, në oborrin e QKUK-së ka ndodhur një vdekje. Në njoftim thuhet se organet policore ndodhen në vendin e ngjarjes, por nuk shpjegojnë detaje të mëtejshme.
“Qendra Klinike Universitare e Kosovës konfirmon se sonte rreth orës 18:00, në oborrin e QKUK-së ka ndodhur një vdekje.
Organet policore menjëherë ka dalë në vendin e ngjarjes si dhe dyshimet e para nga Policia janë se bëhet fjalë për vrasje Policia në koordinim me prokurorin e shtetit ka nisur një hetim dhe po vijon ndërmarrjen e të gjitha veprimeve hetimore dhe të ekzaminimit, me qëllim të sqarimit të plotë të ngjarjes. Detajet e tjera do të jepen nga organet kompetente që janë duke kryer hetimet,”- thuhet në postim.
Ndërkohë rrjeti i Grave të Kosovës me organizata të tjera kanë bërë thirrje për protesta, pas vrasjes së 35-vjeçares shtatzënë në maternitetin e Kosovës.
Pas kësaj ngjarjeje të rëndë është bërë njoftimi për zhvillimin e protestave nesër në orën 16:00 në sheshin Zahir Pajaziti të Prishtinës.
