Policia e Shtetit ka bërë bilancin për këtë javë. Fokusi ka qenë goditja e vjedhjeve në vend, si dhe janë arrestuar një grup personash të shpallur në kërkim ndërkombëtar me qëllim ekstradimin drejt shteteve respektive.
Njoftimi i Policisë
- 1 shtetas i kërkuar nga Spanja, si pjesëtar i një organizate të dhunshme kriminale, përgjegjëse për një sërë veprash penale, u kap në Fier, në kuadër të operacionit “Member”.
- Operacioni “Ndjekja” në Tiranë u finalizua me arrestimin e një shtetasi, i cili duke qenë i armatosur me pistoletë, u largua me automjet nga fshati Prush, ku u konfliktua me disa shtetas të tjerë.
- Operacioni “Reagimi” vuri në pranga, brenda 6 orësh nga ngjarja, autorin e një plagosjeje me thikë, në Shijak.
- Hetimet e thelluara për një ngjarje të raportuar si aksidentale, në Maliq, bënë të mundur zbardhjen e dinamikës së saj dhe vënien në pranga të një 77-vjeçari, i cili goditi me sende të forta, me pasojë vdekjen, djalin e tij.
- U zbardhën 10 vjedhje të ndodhura më parë, në Sarandë, Durrës dhe Berat dhe u vunë në pranga 3 autorët e tyre.
- 4 raste të shpërndarjes në doza, të lëndëve narkotike kokainë dhe kanabis, u goditën në qarqet Gjirokastër dhe Vlorë. Për këto raste u vunë në pranga 3 shtetas, ndërsa në hetim 3 të tjerë.
- Në Portin e Vlorës u arrestua një shtetas me precedent të mëparshëm kriminal, i cili tentoi të kontrabandonte drejt vendit tonë, një shumëllojshmëri produktesh.
- Në Korçë, operacioni “Basti i fundit” shkatërroi një tjetër ambient ku 7 shtetas luanin lojëra fati (bixhoz me zare), në kundërshtim me ligjin. U sekuestruan pajisjet dhe shumat e parave që i shërbenin kësaj veprimtarie.
- Operacionet dhe aksionet policore vijojnë 24/7, në çdo skaj të vendit.
