Komisioni i Pavarur i Kualifikimit ka shtyrë vendimin për prokurorin e Krimeve të Rënda, Anton Martinin.
Vendimi do të jepej sot në orën 10:00, por KPK ka njoftuar se për shkaqe të arsyeshme seanca nuk do të zhvillohet sot.
Në njoftim nuk përcaktohej as data se kur do të mbahet seanca e radhës.
Në seancën e fundit, Martini deklaroi se gjatë gjithë jetës ka blerë një shtëpi dhe një garazh.
Ai theksoi se për pagesën e tyre ka marrë kredi, pasi donte të jetonte në një zonë që është nën ruajtjen e policisë, për shkak të kërcënimeve që ka marrë për shkak të detyrës.
Ndërsa kërkoi konfirmimin nga trupa gjykuese, ai shtoi se nuk ka bërë asnjë shkelje në detyrë.
Anton Martini është 45 vjeç dhe me origjinë nga Tropoja.
Ai arriti që të shkatërrojë bandën e Durrësit dhe kërkoi burgim të përjetshëm për kreun e saj, Lulzim Berishën.
Tashmë ai ka në dorë dosjen e atentatit ndaj prokurorit Arjan Ndoja
Martini e ka nisur karrierën në drejtësi në 1999-ën dhe është emëruar te Krimet e Rënda në 2004-ën.
Ai ka mbajtur edhe postin e drejtuesit të Prokurorisë së Shkodrës.
Në 2015-ën ai u transferua në Shkodër nga Këshilli i Prokurorisë, por Arta Marku e ktheu sërish te Krimet e Rënda në 2018-ën.
Martini ka hetuar gjithashtu Lazaratin, vrasjen e ish-efektivit, Ibrahim Basha, si dhe ka kërkuar dënim për Arben Frrokun, i cili akuzohet për vrasjen e kryekomisarit, Dritan Lamaj.
Gjithashtu Martini ka hetuar bandën e Lushnjes, si dhe ka goditur bandën e Cërrikut.
