Nga Ajola Xoxa te Belinda Balluku, a po kthehet shtatzënia në “mburojë” ndaj SPAK-ut?

Pak muaj më parë, rasti i Ajola Xoxës u komentua gjerësisht në opinionin publik. Shtatzënia dhe më pas lindja e fëmijës përkuan me një periudhë kur ajo përballej me procedurat e SPAK-ut, ndërsa mbrojtjet që ligji parashikon për gratë shtatzëna dhe lehonat sollën shtyrje të disa proceseve. Ligji është i qartë dhe garanton këtë mbrojtje, por rasti hapi një debat të fortë: a mund të shndërrohet një garanci ligjore e krijuar për të mbrojtur mëmësinë në një mekanizëm që, në praktikë, vonon përballjen me drejtësinë?

Tashmë, pas lajmeve të pakonfirmuara që qarkullojnë prej ditësh për një shtatzëni të mundshme të zëvendëskryeministres Belinda Balluku, i njëjti diskutim është rikthyer edhe një herë. Nuk ka asnjë konfirmim zyrtar për këto pretendime, megjithatë ngjashmëria me rastin e mëparshëm ka bërë që në rrjetet sociale dhe në debatin politik të shtrohet sërish e njëjta pyetje.

Këtë temë e preku sot edhe kreu i Partisë Demokratike, Sali Berisha, i cili gjatë deklaratës së tij për mediat nga SPAK përdori ironi, duke thënë se në Prokurorinë e Posaçme “po ndërtohet një minimaternitet”.

“Ministret, gratë zyrtare të qeverisë përdorin shenjtërinë e mëmësisë për të shpëtuar nga krimet për të cilat duhet të digjeshin në ferr. Flitet për disa, ishte Belinda, Velica dhe u hap shtegu. Janë disa ministre, ish-ministre deputete, ka nisur si epidemi.”

Në një tjetër pjesë të deklaratës së tij, Berisha shtoi:

“Përdorin ligjin e shenjtë të mëmësisë për t’iu kundërvënë Kodit Penal. E dënoj me forcën më të madhe.”

Përtej gjuhës politike dhe ironisë së përdorur nga Berisha, diskutimi që është hapur nuk lidhet vetëm me një emër të caktuar. Debati është më i gjerë dhe prek një çështje që shumë qytetarë e shohin me shqetësim: nëse një mekanizëm ligjor i krijuar për të mbrojtur nënat mund të perceptohet si një rrugë për të shtyrë apo vonuar përballjen me drejtësinë, atëherë besimi te barazia para ligjit vihet në provë.

Natyrisht, nuk ka asnjë provë që shtatzënitë për të cilat flitet publikisht kanë lidhje me hetimet apo procedurat penale, dhe një pretendim i tillë nuk mund të paraqitet si fakt. Megjithatë, fakti që një rast i tillë u diskutua gjerësisht me Ajola Xoxën dhe se sot po ngrihen të njëjtat pikëpyetje edhe për Belinda Ballukun, tregon se perceptimi publik po krijon një model që rrezikon të kthehet në fenomen.

Mbrojtja e mëmësisë është një e drejtë që nuk mund të vihet në diskutim. Por po aq i rëndësishëm është edhe besimi se drejtësia vepron njësoj për të gjithë dhe se asnjë garanci ligjore nuk perceptohet si privilegj për zyrtarët që përballen me hetime. Pikërisht ky perceptim është ai që po ushqen debatin publik dhe që rrezikon të kthehet në një “modë” mes personazheve të pushtetit që ndodhen nën hetim.