Një ngjarje tronditëse ka tronditur Nepalin mes protestave të dhunshme që kanë përfshirë vendin këto ditë. Bashkëshortja e ish-kryeministrit Jhala Nath Khanal ka humbur jetën në mënyrë tragjike, pasi u dogj e gjallë brenda shtëpisë së saj, gjatë një prej sulmeve që protestuesit ndërmorën ndaj rezidencave të zyrtarëve të lartë. Zjarri që përfshiu banesën e tyre, sipas mediave vendase, shpërtheu në kulmin e përplasjes mes turmave të zemëruara dhe forcave të sigurisë, në një atmosferë të mbushur me dhunë, kaos dhe revoltë të papërmbajtshme popullore.
Trazirat nisën fillimisht si reagim ndaj vendimit të qeverisë për të bllokuar 26 rrjete sociale më 4 shtator, përfshirë Facebook, YouTube, X (Twitter) dhe Signal. Ky veprim shkaktoi zemërim të madh në mesin e të rinjve, të cilët dolën në rrugë në protestë kundër censurës, por shumë shpejt pakënaqësitë u kthyen në revoltë të hapur kundër korrupsionit, nepotizmit dhe mungesës së drejtësisë. Brenda tre ditësh, turma të mëdha protestuesish rrethuan institucionet qendrore, përfshi godinën e Parlamentit dhe rezidencat e liderëve politikë. U dogjën zyrat e gjykatës, selitë e partive dhe disa banesa të figurave politike, përfshirë atë të ish-kryeministrit Khanal.
Në përballje me dhunën në rritje, më 9 shtator kryeministri në detyrë K.P. Sharma Oli dha dorëheqjen, ndërsa qeveria hoqi ndalimin e mediave sociale. Megjithatë, për shumë qytetarë, këto hapa erdhën shumë vonë. Deri më tani janë raportuar të paktën 19 viktima dhe qindra të plagosur, ndërkohë që ushtria ka marrë kontrollin e aeroportit ndërkombëtar në Katmandu për të siguruar daljen e figurave të rrezikuara politike.
Populli i Nepalit e ka treguar qartë se asnjë pushtet nuk mund të qëndrojë mbi vullnetin e qytetarëve. Censura nuk mund të vendoset, përveçse nëse vetë populli zgjedh të heshtë. Në Nepal, populli zgjodhi të flasë dhe zëri i tij ka përvëluar një qeveri të tërë.
