Në mes të bombardimeve dhe kërcënimeve ushtarake, një ngjarje e rrallë dhe prekëse ka ndodhur në qytetin e Haifës
Një grua solli në jetë trinjake vajza përmes një lindjeje cezariane të parakohshme në javën e 34-të të shtatzënisë.
Mjeku Yaniv Zipori konfirmoi se ndërhyrja shkoi pa komplikime dhe se nëna, e cila u bë për herë të parë prind, ndodhet në gjendje të mirë shëndetësore.
Sipas mjekut, edhe foshnjat janë të stabilizuara dhe po marrin kujdesin e nevojshëm në njësinë e terapisë intensive neonatale.
Aktualisht, Spitali Rambam funksionon nën tokë me kapacitet për 2,100 pacientë, përfshirë salla operacioni, reparte lindjeje dhe një kopsht për fëmijët e stafit mjekësor. Në të po trajtohen rreth 600 pacientë.
Ndërkohë, situata në rajon vazhdon të përshkallëzohet. Haifa, qyteti i tretë më i madh i Izraelit, është mes zonave të goditura nga raketat iraniane, pjesë e një serie përplasjesh që kanë nisur prej 13 qershorit, kur Izraeli kreu sulme ajrore ndaj objektivave në Iran.
Si përgjigje, Irani ka përdorur raketa, dronë dhe ka kërcënuar me sulme të pakufizuara nëse përfshihen drejtpërdrejt edhe Shtetet e Bashkuara.
Udhëheqësi suprem iranian, Ajatollah Ali Khamenei, deklaroi se “beteja ka filluar”, duke paralajmëruar se Teherani nuk do të kursejë asgjë ndaj udhëheqësve izraelitë.
Mes tensioneve, Donald Trump i kërkoi Teheranit një “dorëzim pa kushte”, ndërsa SHBA po përforcon praninë ushtarake në Lindjen e Mesme.
Sipas “New York Times”, Irani po përgatit goditje ndaj bazave amerikane në rajon dhe mund të vendosë mina në Ngushticën e Hormuzit në rast ndërhyrjeje të SHBA. Ndërkohë, sipas raportimeve nga Haaretz dhe Reuters, ambasadori iranian në OKB paralajmëroi se çdo sulm do të ketë përgjigje të ashpër.
Në terren, bilanci i viktimave vazhdon të rëndohet. Të paktën 34 persona kanë humbur jetën në Gaza nga bombardimet izraelite, ndërsa mbi 90 të tjerë janë plagosur në Izrael nga raketat iraniane.
Duke refuzuar thirrjet ndërkombëtare për armëpushim, ushtria izraelite ka ndjekur një ofensivë brutale kundër Rripit të Gazës që nga tetori 2023, duke vrarë mbi 55.400 palestinezë, shumica prej tyre gra dhe fëmijë.
Forcat Mbrojtëse të Izraelit raportuan rrëzimin e shtatë dronëve gjatë natës dhe njoftuan goditjen e objektivave strategjikë në Teheran, përfshirë Universitetin e qytetit.
Ushtria izraelite ka shpallur gjendje të jashtëzakonshme në të gjithë vendin.
Shtetet e Bashkuara dhe Izraeli janë në komunikim të ngushtë përmes kanaleve të nivelit të lartë, ndërsa pritet vendimi i Trump mbi një ndërhyrje të mundshme direkte në konflikt.
