Nëna e 12-vjeçarit që humbi jetën më 8 janar në Spitalin Pediatrik të QSUT-së ka goditur mjeken e këtij spitali, duke pretenduar se ajo ka neglizhuar mjekimin e djalit të saj. Pas kallëzimit të mjekes, policia ka nisur hetimet për ngjarjen.
“Specialistët për Hetimin e Krimeve të Komisariatit të Policisë Nr. 4 referuan materialet në Prokurori, për shtetasen R. S., 44 vjeçe, për veprën penale “Goditje për shkak të detyrës”, pasi ka kallëzuar shtetasja J. B., mjeke në Spitalin Pediatrik, se 44-vjeçarja ka ushtruar dhunë fizike ndaj saj, në ambientet e këtij spitali, me pretendimin se ajo ka neglizhuar mjekimin e djalit 12-vjeçar të shtetases R. S., i cili ka humbur jetën më datë 08.01.2025, në këtë spital”.
Kujtojmë se më 8 janar, 12-vjeçari nga Maliqi humbi jetën në Spitalin e Qendrës Spitalore Universitare “Nënë Tereza”. Në reagimin e saj, QSUT njoftoi se i mituri ishte diagnostikuar me miokardit akut, një sëmundje e rrallë dhe e rrezikshme, e cila ka një shkallë të lartë vdekshmërie.
