Ajola Xoxa, bashkëshortja e kryebashkiakut të Tiranës Erion Veliaj, është paraqitur në Prokurorinë e Posaçme në zbatim të masës së sigurisë “detyrim për paraqitje”.
Ajo ndodhet nën hetim për disa vepra penale të rënda, në kuadër të dosjes hetimore që përfshin dhe bashkëshortin e saj.
SPAK e akuzon Xoxën për korrupsion pasiv të funksionarëve të lartë shtetërorë ose të zgjedhur vendorë, në bashkëpunim (nëntë herë), pastrim të produkteve të veprës penale ose të veprimtarisë kriminale, si dhe fshehje apo deklarim të rremë të pasurive dhe interesave private, si subjekt i detyruar për deklarim sipas ligjit. Akuzat e ngritura bazohen në nenet 260, 25, 287/2 dhe 257/a/2 të Kodit Penal.
Hetimet e SPAK kanë zbuluar një skemë të mirëorganizuar, përmes së cilës Xoxa, në bashkëpunim me Veliajn, dyshohet se ka krijuar një rrjet përfitimesh të paligjshme nga fondet publike të Bashkisë së Tiranës.
Sipas prokurorisë, kjo skemë kishte si qëllim pasurimin personal dhe familjar, përmes veprimeve të kamufluara dhe në kundërshtim me ligjin.
Fillimisht, ndaj saj ishte caktuar masa e sigurisë “arrest në shtëpi”, por kjo masë u zbut në seancën e vlerësimit të masës nga Gjykata e Posaçme, e cila vendosi “detyrim për paraqitje”.
