Ministri i Jashtëm në detyrë Gent Cakaj tha se Shqipëria në qershor pret vendim pozitiv për negociatat, duke theksuar se janë plotësuar të gjitha rekomandimet.
Në Këshillin e Integrimit, Cakaj apeloi se tashmë është momenti për dialog jo vetëm me BE-në, por dhe me faktorët brenda vendit.
“Situata në Shqipëri është duke u polarizuar dhe ky nuk është thjesht një proces që kërkon dialog me vendet anëtare të BE-së, por mbase edhe dialog të brendshëm politik për të siguruar konsensusin e nevojshëm në implementimin e reformave të kërkuara në dritën e këtij objektivi”-tha Cakaj.
Ndërsa Taulant Balla, tha se mungesa e opozitës nuk do të pengojë punën për integrimin, ai tha se pavarësisht djegies së mandateve puna e mazhorancës për integrimin nuk ndalet.
I pyetur në Këshill nëqoftëse zgjedhjet brenda Parlamentit Europian mund të shtyjnë negociatat, Cakaj tha se vonesa mund të ketë vetëm publikimi i raportit, por jo dhënia e vendimit në qershor.
Ndërsa për mundësinë e shtimit të vendeve skeptike, ai u përgjigj: “Po vazhdon puna në ndërgjegjësimin e shteteve anëtare, të cilat janë relativisht skeptike ndaj procesit të zgjerimit në terësi.”
