Hapja e kufijve nga BE për Ballkanin Perëndimor është një çështje që ka ngelur në pikëpyetje.
Kufijtë mund të mbeten të mbyllur për qytetarët e Kosovës dhe për vendet e tjera të rajonit të Ballkanit Perëndimor edhe pas datës 1 korrik.
Komisioni Evropian është shprehur edhe më herët që kufijtë e BE të hapen në këtë datë.
Para dy javësh Komisioni Evropian kishte rekomanduar që kufijtë e brendshëm të BE-së të hapen jo më vonë se me datën 15 qershor, ndërsa ata të jashtëm gradualisht prej 1 korrikut.
Ndërsa për vendet e Ballkanit Perëndimor, Komisioni kishte rekomanduar që kufijtë e jastëm të hapen prej 1 korrikut, duke e arsyetuar këtë datë si më të arsyeshmen pas situatës së shkaktuar nga pandemia Covid-19.
Komisioni kishte konstatuar se kjo situatë në vendet e Ballkanit Perëndimor është “e ngjashme apo edhe më e mirë sesa në vendet e BE-së”.
Situata në rajon vazhdon të jetë ende e përkeqësuar, pasi çdo ditë ka shtim të numrit të rasteve të të infektuarve me koronavirus.
Kjo situatë ka bërë që disa shtete të BE të marrin masa individuale dhe që të vihet në pikëpyethe heqja e kufizimeve për hyrjen në BE të shtetasve të vendeve të Ballkanit Perëndimor.
Zëdhënësi për çështje të migrimit në Komisionin Evropian, Adalbert Jahns, ka thënë se u takon vendeve anëtare të vendosin për heqjen apo jo të kufizimeve për qytetarët e Ballkanit Perëndimor.
“Rekomandimi për nuk ishte vetëm për shkak të situatës epidemiologjike por edhe për shkak të raporteve të BE-së me atë rajon.
Sa i përket situatës, ne jemi duke e ndjekur me shumë kujdes.
Diskutimet në Këshill janë në vazhdim e sipër dhe në ato diskutime merret parasysh edhe situata aktuale epidemiologjike”, ka thënë ky zëdhënës në Komisionin Evropian.
Edhe pse Komisioni Evropian mund të paraqesë rekomandime, vendimi për të hapur apo jo kufijtë u takon vendeve anëtare.
Disa vende anëtare të BE-së tashmë janë duke i rritur masat për kufizimin e hyrjes së shtetasve nga vendet e Ballkanit Perëndimor.
