Orient Hoxha ishte dënuar në mungesë nga drejtësia shqiptare për “Vjedhja me dhunë”, kyer në bashkëpunim dhe “Marrëdhënie seksuale me dhunë me të rritura”, mbetur në tentativë.
Shqiptari për t’i shpëtuar burgut ishte arratisur në Londër, ku edhe është arrestuar.
Pasi mori këtë lajm nga Interpoli, Prokuroria e Përgjithshme paraqiti pranë autoriteteve të drejtësisë së Mbretërisë së Bashkuar kërkesën për ekstradimin nga Mbretëria e Bashkuar në Shqipëri të Hoxhës.
Mirëpo, Top Channel ka mësuar se Gjykata e Ekstradimeve në Londër, më 13 Janar 2020, pezulloi procedurat e ekstradimit për të shpallurin në kërkim Orient Hoxha.
Kjo pasi Gjykata e Rrethit Gjyqësor Tiranë ka vendosur shuarjen e dënimit të caktuar ndaj këtij shtetasi me vendimin objekt të kërkesës për ekstradim, për efekt të Ligjit Nr. 141/2016 “Për dhënie amnistie”.
Ne këto kushte, autoritetet e drejtësisë së Mbretërisë së Bashkuar me anë të e-mail-it, kërkuan marrjen në konsideratë të tërheqjes së kërkesës për ekstradim.
Kështu, Prokuroria e Përgjithshme bazuar në vendimin e lartpërmendur kërkoi nga Interpol Tirana (shkresa ne janar 2020), heqjen nga kërkimi ndërkombëtar të shtetasit Orient Hoxha.
Pas konfirmimit të këtyre fakteve, Ministria e Drejtësisë procedoi me tërheqjen e ekstradimit.
