Më 9 mars vendi ynë do zgjohej me dy të infektuar dhe deri tani janë 868 të infektuar, 31 viktima dhe 650 persona të shëruar.
Mirëpo, situata duket se po shkon drejt përmirësimit pasi prej javësh kurba ka qenë në rënie, teksa ka nisur edhe hapja graduale e vendit.
Së fundmi, kreu i Task-Forcës dhe rektori i Universitetit të Mjekësisë, prof. Arben Gjata, ka dhënë një mesazh për qytetarët, lidhur me situatën në vendin tonë.
Në një video të shpërndarë nga ministrja e Shëndetësisë Ogerta Manastirliu në rrjetet sociale, Gjata iu bën thirrje qytetarëve që të vijojnë të zbatojnë masat e distancimit social dhe higjienës personale, edhe gjatë kësaj periudhe të hapjes.
Sipas tij, këto dy masa janë të domosdoshme t’i vazhdojmë edhe në këtë periudhë hapjeje, në mënyrë që të mos kemi kthim pas, si edhe të mësohemi me këtë mënyrë të re jetese.
Kreu i Task-Forcës shprehet se jemi në fund të periudhës shumë të vështirë të pandemisë dhe u bën thirrje qytetarëve të ua lehtësojnë punën në të ardhmen, siç kanë bërë deri tani, duke respektuar rregullat e distancimit dhe higjenës.
“Jemi në fundin e periudhës shumë të vështirë që kaluam të gjithë së bashku të kësaj epidemie shumë të rëndësishme. Janë duke u marrë masa të hapjes së ekonomisë, jetës sociale, të mënyrës si punojmë, si jetojmë. Jemi drejt një finishi, ku të gjithë kemi dhënë kontribut. Falënderimi i parë është për mjekët në vijën e parë, por pa ju, pa bashkëpunimin dhe mirëkuptimin tuaj, do të ishte e pamundur t’ia dilnim kësaj situate.Do të kërkoja nga ju që të vazhdojmë të jemi të ndërgjegjshëm, që janë vetëm masat e distancimit fizik, ruajtja e distancës, e higjienës personale, që janë të domosdoshme t’i vazhdojmë edhe në këtë periudhë hapjeje, në mënyrë që të mos kemi kthim pas. Është mënyra e vetme dhe e domosdoshme, që ne të përshtatemi me realitetin e ri, me mënyrat e reja të jetesës, deri në fund të epidemisë, dhe kur të kemi masa të sigurta që të luftojmë siç duhet këtë virus. Ju bëj thirrje të gjithëve të na e lehtësoni punën në të ardhmen, siç keni bërë deri tani, duke respektuar rregullat e distancimit dhe higjenës”, shprehet Gjata.
https://www.facebook.com/168952600227465/posts/949516868837697/
