Banorët e zonës së Laknasit, në Bashkinë e Kamzës ditën e sotme janë përplasur sërish me policinë. Në një zonë të pyllëzuar punonjësit e policisë kanë shkuar ditën e sotme për të prerë pemët pasi është parashikuar që të ndërtohet një fermë dhe një thertore derrash.
Mësohet se protestës së banorëve të Laknasit i janë bashkuar edhe ambientalistët për ruajtjen e pyjeve. Gjithashtu disa nga banorët kanë dhënë prononcim për News 24 dhe kanë thënë se pyllin e kanë ndërtuar vetë ata dhe tani duan ta shkatërrojnë. Banorët thonë se prerja e pyllit është vepër penale dhe kanë paralajmëruar se do të ketë gjakderdhje.
Banorja: Kanë ardhur në orën 3 që të vazhdojnë punimet, na lajmëruan neve dhe dolëm, u përleshëm keq fare. Kemi që në orën 3 e deri më tani që po përleshemi fizikisht. Tokës i ka mbaruar leja, këta thonë që kanë marrë një njoftim nga bashkia. Ne do të vdesim aty të gjithë, nuk e lejojmë. Pylli ka shumë vite që është ndërtuar nga vetë ne, i shërbejmë brez pas brezi, tani këta duan ta presin dhe të bëjnë thertoren. Po të bëhet thertorja, ne nuk jetojmë dot këtu.
Banori: Nuk mund të pritet një pyll për të ndërtuar një thertore, është vepër penale. Kemi një qëndrim tejet agresiv të firmës së ndërtimit dhe një heshtje totale të shtetit, të institucioneve përkatëse, që duhet të reagonin, pasi pylli është shumë pranë Tiranës.
Banorja: Do të bëhet me gjakderdhje, policët thonë se do i vënë flakën gjatë natës. Po na ikën truri!
