Në brigjet shqiptare të Liqenit të Ohrit, pranë fshatit Lin, arkeologët kanë bërë një zbulim të jashtëzakonshëm: një nga vendbanimet më të hershme në Europë që është ndërtuar mbi ujë, me moshë deri në 8,000 vjet. Ky është një prej vendbanimeve më të vjetra të njohura ndonjëherë në një liqen europian.
Një ekip arkeologësh nga Zvicra dhe Shqipëria ka kaluar vite duke punuar nën ujë në thellësi rreth 3 metrash për të nxjerrë nga nëntoka shtyllat prej druri që mbështesnin shtëpitë e komunitetit të lashtë. Përveç drurit, janë gjetur edhe eshtra të kafshëve të egra dhe të zbutura, sende prej bakri, si dhe enë qeramike me gdhendje të detajuara.
Profesori Albert Hafner nga Universiteti i Bernës shpjegon se vendbanime të ngjashme janë zbuluar më parë në Alpe dhe rajone mesdhetare, por ato në Lin janë rreth 500 vjet më të hershme.
Datimi është kryer me metoda të avancuara si radiokarboni dhe dendrokronologjia, e cila analizonte unazat vjetore të pemëve. Deri tani janë mbledhur më shumë se një mijë mostra druri.
Ky vendbanim zë një sipërfaqe prej rreth gjashtë hektarësh, por gjatë gjashtë viteve të fundit është studiuar vetëm rreth 1% i tij. Studiuesit mendojnë se në këtë komunitet kanë jetuar disa qindra njerëz, të cilët ushqeheshin kryesisht me bujqësi, gjueti dhe blegtori.
Zbulimi në Lin ndihmon në kuptimin e një pjese të panjohur të historisë së Shqipërisë dhe tregon rolin kyç që kanë pasur banorët e lashtë në përhapjen e bujqësisë dhe blegtorisë në Europë.
Liqeni i Ohrit, i cili ndahet mes Shqipërisë dhe Maqedonisë së Veriut, konsiderohet liqeni më i vjetër në Europë me një moshë mbi një milion vjet. Ky zbulim e ngre zonën e Lin-it në një thesar arkeologjik dhe historik me vlerë të jashtëzakonshme.
