Dosja e ish-ministrit të Brendshëm, Saimir Tahiri ka kaluar në Apelin e Gjykatës së Posaçme.
Sot në mesditë pritet të hidhet edhe shorti për të përcaktuar gjyqtarët, që do të kenë në dorë dosjen e tij.
Në shtator të 2019-ës, Tahiri u dënua për “Shpërdorim detyre” nga Gjykata e Krimeve të Rënda.
Brenda 15 ditëshit, vendimi u ankimua si nga avokati i tij, por edhe Prokuroria.
Pas 5 muajsh dosja më në fund ka kaluar në Apel.
Kjo vonesë ka ndodhur për shkak të konsumimit të të gjitha mënyrave proceduriale për të njoftuar të pandehurin tjetër, ish-shefin e policisë së Vlorës, Jaeld Çela.
Ky i fundit u gjykua në mungesë, ndërsa edhe sot e kësaj dite nuk është arrestuar ende.
Saimir Tahiri u dënua me 3.4 vite burg për “Shpërdorim detyre”, por gjykata vendosi që dënimin të konvertohet në 3 vite në shërbim prove.
Gjatë kësaj kohe, Tahiri nuk duhet të kryejë vepra penale, apo të takohet me të dënuar.
