Raportet ndërkombëtare e kanë nxjerrë Tiranën si një nga qytetet me ndotjen më të lartë të ajrit në Europë, por nëse do të shohim shifrat konkrete, situata bëhet më alarmante.
Sipas faqeve ndërkombëtare, MSN.COM, një nga më të klikuarat nga turistët, sot në Tiranë Indeksi i Cilësisë së Ajrit është 305, çfarë do të thotë se është në nivelin “e rrezikshme” për jetën e qytetarëve. Qytetarëve u sugjerohet që të shmangin aktivitetet jashtë shtëpisë, të mbyllin dritaret dhe të mbajnë maska, pasi mund të përjetojnë efekte negative shëndetësore.
Nëse do ta krahasojmë me rajonin, ajri në Tiranë është 3 herë më i ndotur se Podgorica e Shkupi dhe rreth 10 herë më i ndotur se Athina.
Por pse Tirana është një nga qytetet me ajrin më të ndotur në Europë?
Transporti i rënduar, shoqëruar edhe cilësinë e naftës dhe me flotën e vjetër të automjeteve që qarkullojnë në Tiranë është një nga arsyet e ndotjes së ajrit. Gjithashtu në ndotjen e ajrit në kryeqytet po ndikojnë ndërtimet e shumta dhe punët publike.
Sipas Organizatës Botërore të Shëndetësisë, dhjetëra persona në Shqipëri humbin jetën çdo vit si pasojë e ndotjes së ajrit, pasi cilësia e ajrit nxit sëmundje ishemike të zemrës, duke i çuar qytetarët drejt vdekjes.
Më të rrezikuar janë të moshuarit, të sëmurët kronikë, të sapolindurit dhe gratë shtatzëna. Çfarë e bën më shqetësuese këtë rrezik, është se në Shqipëri, prej 3 vitesh Agjencia Kombëtare e Mjedisit nuk e monitoron cilësinë e ajrit./Ditar.al
