Kreu i Partisë Demokristiane, Nard Ndoka ka qenë ipranishëm në tubimin e mbajtur nga demokratët poshtë banesës së ish-kryeministrit, Sali Berisha.
Ndoka ka mbajtur fjalimin e tij, duke u shprehur se arrestimi i liderit të opozitës është tërësisht një lëvizje politike nga ana e Ramës dhe kjo është e pafalshme.
Ai shtoi se Berisha është një pengesë reale e qeverisë së Ramës dhe se ai ishte personi që çliroi PD-në nga kapja e saj.
“Ne nuk jemi kundër drejtësisë, është e pafalshme që liderit të opozitës i hiqet e drejta e komunikimit. Është një luftë e pastër politike. Berisha është pengesë reale e qeverisë së Ramës, është i vetmi burrë shteti që kishte guximin për të akuzuar me prova këtë kryeministër arrogant. Kjo e ka trembur atë, por e kanë akoma më frikë sepse çliroi PD-në, ish-kreu i të cilës u kap peng. Berisha ia prishi planet dhe gjumin edhe Lulit edhe Ramës”, është shprehur Ndoka.
