Partia qendrore në pushtet e Presidentit Francez Emmanuel Macron ka ndaluar një kandidate myslimane të kandidojë në një zgjedhje lokale pasi ajo ishte fotografuar me një hixhab për një fletushkë fushate, një veprim i cili ka tërhequr kritika nga ekspertët dhe ka hapur ndarje të hidhura brenda partisë.
La Republique en Marche (Republika në Lëvizje, LREM) e Macron tha se linja e partisë ishte që në Francën laike, nuk duhet të kishte vend për shfaqjen e hapur të simboleve fetare në dokumentet e fushatës elektorale.
“Kjo grua nuk do të jetë një kandidate e en Marche,” i tha Stanislas Guerini, sekretari i përgjithshëm i partisë, radion RTL, duke iu referuar Sara Zemmahi.
Një zyrtar i LREM pranë Guerini tha se Zemmahi do të informohej zyrtarisht për vendimin e partisë me shkrim, sipas agjencisë së lajmeve Reuters. Në poster, Zemmahi është fotografuar e veshur me një hixhab të bardhë, një shami koke të veshur nga shumë gra muslimane që mendojnë se është pjesë e fesë së tyre, duke qëndruar përkrah tre personave të tjerë.
Fjalët “Të ndryshme, por të bashkuara për ju” në fletushkë duket se janë një referencë ndaj diversitetit. Ligji francez nuk ndalon mbajtjen e hixhabit ose simboleve të tjera fetare në imazhe që shfaqen në fletushka fushate.
Afera për posterin e fushatës shpërtheu pasi Jordan Bardella, numri dy në partinë e djathtë ekstreme të Marine Le Pen, shkroi në Twitter një kopje të fletushkës me mesazhin: “A jeni kështu duke luftuar separatizmin?”
Guerini u përgjigj direkt në Tëitter, duke kërkuar që fletushka të tërhiqej ose kandidatja Sara Zemmahi të humbte mbështetjen e partisë.
“Të padenjë. Vrapimi pas votave [të ekstremit të djathtë] do të lejojë që idetë e tyre të mbizotërojnë. Mjaft më, ”shkruajti deputetja e LREM-it Caroline Janvier.
Por një tjetër ligjvënës i partisë, Roland Lescure, i tha Reuters: “Është një temë shpërthyese. Islami politik është një realitet, është një kërcënim i zymtë në disa lagje dhe ne duhet të jemi shumë të vendosur. ”
