Në kuadër të operacionit për riatdhesimin e shtetasve në aeroportin e Rinasit kanë mbërritur 2 chartera gjatë 2 ditëve të fundit. Ata kanë riatdhesuar shqiptarë të cilët kanë qëndruar në mënyrë të parregullt në territorin britanik dhe në atë francez Mësohet se kemi të bëjmë me 72 shtetas shqiptarë të kategorisë “Deportiv”. Në këtë operacion bëjnë pjesë edhe ato shtetas që e kanë përfunduar kryerjen e dënimit, për vepra të ndryshme penale, në Angli dhe Francë.
Në charter-in e parë që mbërriti nga Anglia, ndodheshin 24 shtetas shqiptarë, nga të cilët 21 shtetas shqiptarë që e kanë përfunduar vuajtjen e dënimit në territorin britanik, për vepra të ndryshme penale të kryera atje dhe 3 shtetas të tjerë, për qëndrim të parregullt në Angli. Këta shtetas, pasi iu nënshtruan procedurave të intervistimit dhe verifikimit, u lanë të lirë.
Ndërsa në charter-in e dytë që mbërriti nga Franca, ndodheshin 48 shtetas shqiptarë, të cilët ishin me qëndrim të parregullt ne territorin francez, disa prej tyre janë kapur në tentativë për të shkuar në Angli, dhe të tjerët janë shtetas që e kanë përfunduar vuajtjen e dënimit, per vepra te ndyshme penale të kryera në Francë.
4 prej shtetasve të kthyer “Deportiv” nga Franca, në përfundim të hetimeve, janë proceduar penalisht në gjendje të lirë, për veprën penale “Kalimi i paligjshëm i kufirit shtetëror”.
Operacionet e riatdhesimit do të vijojnë edhe në javët e ardhshme.
Kujtojmë se ministri i Brendshëm Bledi Çuçi së bashku me homologun e tij britanik kanë firmosur një marrëveshje për riatëdhesimin e shqiptarëve të cilët deportojnë në mënyrë ilegale në ishullin e ‘lakmuar’ së tepërmi nga ne.
