Banorët e Laknasit në Kamëz prej disa orësh po konfliktohen dhunshëm me policinë. Mësohet se shkak është bërë nisja e punimeve, për ndërtimin e një thertoreje në pyllin pranë fshatit, shkruan “Newsbomb”.
Thertorja do të ndërtohet nga kompania e prodhimit të mishit, “Daci.al”, e cila ka marrë edhe lejen.
Sipas pronarëve, kjo është bërë në shkelje me ligjin.
Në terren kanë mbërritur gjithashtu edhe forca të FNSH, por edhe policia private.
Banorët akuzojnë ish-kryebashkiakun Xhelal Mziu për dhënien e lejes, si dhe aktualin, Rakip Suli, i cili u kishte premtuar se punimet do të ndërpriteshin për një muaj.
‘’Xhelal Mziu dhe Bledar Daci e kanë kthyer zonën në zallishte, ndërkohë që është zonë pyjore. Rakip Suli ka thënë që do ndërpriten punimet për një muaj. Policia dhe këto të gjithë janë hajdutë. Na kanë marrë në Rajon. Policia dhe punonjësit e bashkisë rrethuan zonën. I kemi mbjellë vetë këto pemë”, tha njëri prej banorëve.
Ndërsa banorët e tjerë shprehen se e kanë mbrojtur pyllin për 50 vjet dhe do ta vazhdojnë ta bëjnë edhe nëse u duhet të derdhin gjak.
“Ne jemi në vendin tonë, e kemi mbrojtur pyllin 50 vjet. Nuk do t’i pranojmë, të ikin ku të duan. Pronari nuk vjen vetë, sjell këlysht e vet. Vendin do ta mbrojmë me gjak. Këtu na kanë thënë është park. Pse vini dhe bëni stallë derrash dhe stallë lopësh? Ne si shtet nuk na ka vënë kush dorë. Ai e ka shkruajtur zallishte, jo pyll. Ne nuk na ka pyetur kush. Këta kanë marrë lekët vetë, si polici si bashki. I kam të gjithë në rajon. Xhelal Mziu dhe Bledar Daci të gjejnë vend dhe të futen, na kanë marrë pyllin”, shprehen banorët.
