Europa dhe Komiteti i Helsinkit alarm për dhunën barbare të policisë ndaj fëmijëve e protestuesve, Skënder Hita mbron efektivët e tij: “Nuk jemi armiq të popullit”!

Ndërsa nga Parlamenti Europian dhe Komiteti Shqiptar i Helsinkit vijnë kritika të forta për dhunën policore ndaj studentëve, të miturve, protestuesve dhe gazetarëve, drejtori i Policisë së Shtetit, Skënder Hita, del në mbrojtje të efektivëve të tij. Në vend të një reagimi të drejtpërdrejtë për rastet e dhunës ndaj qytetarëve, Hita deklaron se policia është prej gjashtë ditësh nën sulm frontal dhe se nuk është armike e popullit.

Kontrasti është i qartë: ndërsa përfaqësues europianë kritikojnë qeverinë shqiptare dhe organizatat e të drejtave të njeriut kërkojnë hetimin e drejtuesve të policisë, kreu i saj përqendrohet te sulmet ndaj efektivëve, duke lënë pa përgjigje akuzat për dhunën e ushtruar nga uniformat blu.

Rihards Kols, anëtar i Komisionit për Punët e Jashtme të Parlamentit Europian, ka akuzuar drejtpërdrejt qeverinë shqiptare për dështim në respektimin e vlerave demokratike.

“Shqipëria paraqitet në Bruksel si një aleate e besueshme e NATO-s dhe një nga vendet kryesuese në procesin e anëtarësimit në BE. Por në vendin e saj, policia përballet me studentët dhe të miturit duke përdorur plumba gome, gaz lotsjellës dhe granata zhurmuese. Gazetarët dhunohen teksa kryejnë detyrën e tyre”, deklaron Kols.

Eurodeputeti thekson se NATO dhe Bashkimi Europian mbështeten te demokracia, shteti i së drejtës dhe respektimi i qytetarëve, parime që, sipas tij, po shkelen nga qeveria shqiptare.

“Vlerat dëshmohen në vendin tënd. Qeveria e Shqipërisë po dështon aktualisht në këtë provë.”

Kols e cilëson gjithashtu fyerje ndaj të rinjve shqiptarë përpjekjen për t’ia atribuar revoltën e tyre kundër korrupsionit dhe pandëshkueshmërisë “ndërhyrjes së huaj”. Ai kërkon hetimin e çdo rasti të dhunës policore dhe respektimin e së drejtës së shqiptarëve për të vendosur vetë për të ardhmen e tyre.

Paralelisht, Komiteti Shqiptar i Helsinkit ka ngritur alarmin për dhunën ndaj të miturve dhe kërkon hetimin e të gjithë zinxhirit komandues të Policisë së Shtetit.

Në monitorimin e kryer më 16 tetor në dhomat e sigurisë të Drejtorisë Vendore të Policisë Tiranë, Komiteti konstatoi dëmtime fizike të dukshme te disa të ndaluar. Të mitur të arrestuar dëshmuan se ishin goditur nga efektivët gjatë arrestimit dhe brenda ambienteve policore. Njëri prej tyre u dërgua për herë të dytë në Spitalin e Traumës gjatë monitorimit.

U konstatuan gjithashtu kushte të papërshtatshme dhe mbipopullim, me tre deri në katër persona, kryesisht të mitur, të mbajtur në dhoma të projektuara për një person. Të ndaluarit denoncuan pengesa në komunikimin me familjarët dhe avokatët, mungesë të kujdesit shëndetësor dhe marrje në pyetje të të miturve pa psikolog.

Komiteti kërkon që Prokuroria dhe Agjencia e Mbikëqyrjes Policore të hetojnë jo vetëm efektivët që kanë ushtruar dhunë, por edhe përgjegjësitë e drejtuesve dhe zinxhirit komandues. Organizata thekson se veprimet e dhunshme të individëve nuk mund të justifikojnë ndëshkimin kolektiv të protestuesve apo përdorimin joproporcional të forcës.

Pikërisht në këtë situatë, Skënder Hita deklaron:

“Policia e Shtetit nuk është kundërshtare e qytetarëve. Ajo është në shërbim të tyre.”

Në reagimin e tij pas sulmit me bomba molotov ndaj Komisariatit nr. 3 në Tiranë, ku sipas policisë mbetën të plagosur 10 efektivë, Hita dënon dhunën ndaj punonjësve të rendit dhe paralajmëron ndëshkimin e autorëve.

“Prej gjashtë ditësh, punonjësit e Policisë së Shtetit po përballen me akte të përsëritura dhune, ndërkohë që vijojnë të përmbushin detyrën e tyre për garantimin e rendit dhe sigurisë publike”, shprehet ai.

Hita deklaron se ka udhëzuar strukturat të veprojnë me vetëpërmbajtje dhe proporcionalitet. Por në reagimin e tij nuk jep asnjë përgjigje konkrete për dëmtimet e të miturve, dhunën barbare ndaj protestuesve apo sulmet ndaj gazetarëve të denoncuara edhe nga eurodeputeti Kols.

Sulmet ndaj policëve kërkojnë hetim dhe përgjegjësi ligjore. Por i njëjti standard duhet të zbatohet edhe kur dhuna ushtrohet nga policia. Uniforma nuk mund të shërbejë si mbrojtje nga përgjegjësia për shkeljen e të drejtave të qytetarëve.

Ndërkohë, protesta kundër qeverisë ka përfunduar ditën e saj të 141-të, me një kërkesë të pandryshuar: dorëheqjen e kryeministrit Edi Rama. Zërat që kërkojnë largimin e tij po shtohen, ndërsa kritikat për mënyrën se si po trajtohen protestuesit kanë marrë edhe vëmendje të gjerë europiane.

Në një kohë kur kërkohet hetimi i efektivëve dhe drejtuesve të tyre, deklarata se policia nuk është armike e popullit nuk mjafton. Pyetja që Skënder Hita ende nuk i është përgjigjur është se kush do të mbajë përgjegjësi për qytetarët dhe fëmijët e dhunuar nga policia që ai drejton?