Një paciente me Covid-19 ndërroi jetë ditën e sotme në spitalin Infektiv në Tiranë.
Bëhet fjalë për një 62-vjeçare me origjinë nga Shkodra e cila ishte shtruar në spital pasi ishte identifikuar me koronavirus, teksa vuante dhe nga sëmundje të tjera.
Në një njoftim për mediat, Ministria e Shëndetësisë sqaron se e moshuara nuk ka ndërruar jetë si pasojë e Covid-19, por nga pankreasi dhe kështu që nuk do të llogaritet si vdekje nga virusi, edhe pse ishte e infektuar.
Ky ështe rasti i tretë që Ministria e Shëndetësisë nuk përfshin në listën e viktimave pacientët që kanë qenë të infektuar nga Covid-19.
Rasti i parë ka qenë ai i pacientit që ndërroi jetë nga ataku kardiak, rasti i dytë ishte diten e djeshme ku në spitalin e Shkodrës ndërroi jetë një pacient dhe ministria tha se vdekja ka ardhur si pasojë e hemoragjisë cerebrale dhe rasti i tretë ditën e sotme.
Sipas sqarimeve të dhëna nga ministria të tre pacientët kanë humbur jetën për shkaqe të tjera, por kanë rezultuar pozitiv edhe me Covid-19.
Njoftimi i plotë
“Gjatë ditës së ndërruar jetë në spitalin infektiv një 62-vjeçare si pasojë e një sëmundje të rëndë kronike të pankreasit, me vdekshmëri shumë të lartë: pankreatiti nekrotizant. 62-vjeçarja që vuante edhe nga kanceri dhe astma bronkiale, është sjellë ditën e djeshme në gjendje të rëndë nga spitali i Shkodrës, ku rezultoi bartëse e COVID19, por pa shenja klinike të sëmundjes. Referuar shërbimit infektiv, 62-vjeçarja nuk ka ndërruar jetë si pasojë e COVID19, pasi ishte asimptomatike për këtë sëmundje, por si pasojë e sëmundjes së rëndë të pankreasit. Ministria e Shëndetësisë informon se do të mbajë të informuar publikun për çdo zhvillim, ndaj lutemi t’i referoheni njoftimeve zyrtare“, shkruan ministria e Shëndetësisë.
