Në moshën 80 vjeçare, është ndarë nga jeta Paulin Ndoja një nga figurat më të spikatura të futbollit shqiptar, ish-portieri i Vllaznisë dhe i Kombëtares.
Me një karrierë të shkëlqyer në fushë dhe një jetë të shënuar nga sfida të mëdha për shkak të sistemit, Ndoja mbetet një emër që nuk harrohet.
I lindur më 19 dhjetor 1945 në Shkodër, ai nisi të spikasë që në moshë të re. Në vitin 1965, vetëm 20 vjeç, fiton Kupën e Shqipërisë me Vllazninë.
Pas një pauze për shërbimin ushtarak në Skrapar, rikthehet në skuadër dhe kontribuon në sezonin e lavdishëm 1971-72, ku shkodranët fitojnë si kampionatin ashtu edhe Kupën.
Por pavarësisht talentit dhe përkushtimit, karriera e tij do të ndërpritej papritur, si pasojë e ndërhyrjeve politike.
Në një nga episodet më të dhimbshme të jetës së tij, regjimi komunist i kërkoi të braktiste të fejuarën për shkak të biografisë së familjes së saj.
“Zgjodha dashurinë, jo karrierën,” tregonte ai më vonë. Vendimi i tij për të mos iu bindur partisë solli ndëshkim të menjëhershëm përjashtim nga futbolli në vitin 1973 dhe ndalimin për të përfaqësuar vendin në ndeshje ndërkombëtare, ndonëse ishte thirrur disa herë në Kombëtare.
E vetmja ndeshje zyrtare me fanellën kuqezi mbeti ajo kundër Kinës, ku Shqipëria fitoi 2-1.
Në vitet ’80, Paulin Ndoja rikthehet pranë fushës, këtë herë si trajner portierësh – një rol që e mbajti për dekada dhe me të cilin vazhdoi të kontribuonte në rritjen e brezave të rinj.
Trofetë që mbajnë emrin e tij:
• Si futbollist: Kupa e Shqipërisë (1965), Kampion dhe fitues i Kupës (1971-72)
• Si trajner: Kupa e Shqipërisë (1987), Kampion i Shqipërisë (1992, 1998, 2001)
Reagimi i FSHF-së pas ndarjes së tij nga jeta
Presidenti i Federatës Shqiptare të Futbollit, Armando Duka, e cilësoi Ndojën si një figurë madhështore të futbollit shqiptar. “Mjeshtër i Madh, ikonë e Vllaznisë dhe e sportit tonë kombëtar, ai i dha shumë futbollit, si në fushë ashtu edhe në pankinë. Me përulësi i shpreh ngushëllimet më të sinqerta familjes, të afërmve dhe komunitetit sportiv. Kujtimi i tij do të jetojë përherë mes nesh. U prehsh në paqe, legjendë!”
Paulin Ndoja largohet fizikisht, por kujtimet e tij si sportist, trajner dhe si njeri që nuk u përkul përballë padrejtësive, mbetet frymëzim për brezat që vijnë.
