Ikona e muzikës shqiptare, Nexhmije Pagarusha, është ndarë nga jeta në moshën 86-vjeçare.
Vajza e saj, Cuce Pagarusha ka dhënë lajmin e trishtë pasi ka publikuar një fotografi në profilin e saj në Facebook.
“Zemër ike e qetë ashtu si edhe në jetë. Vdiq Nexhmije Pagarushe”, ka shkruar ndërkohë një familjare e saj.
Bilbil i muzikës shqiptare do të jehojë gjithnjë në kujtesën e kombit me këngët e famshme “E dehun jam”, “Baresha”, “Ani mori nuse”, “Mora testin”, “Dallëndyshe” dhe shumë hite të tjera.
Pagarusha ka kënduar mbi 150 këngë, ndërsa kënga më e njohur e saj është “Baresha”, të cilën e ka kompozuar bashkëshorti Rexho Mulliqi.
Gjatë karrierës së saj muzikore, artistja e madhe ka dhënë koncerte në Kosovë, Shqipëri, Bullgari, Izrael, etj.
Karrierën muzikore e përfundoi në vitin 1984, pas një koncerti në Sarajevë.
Pas 16 vitesh larg skenës, Nexhmija u paraqit në vitin 2000 me këngën “Për ty” në një emision të drejtuar nga Ardit Gjebrea, më pas dhe në jurinë e festivalit “Kënga Magjike 2005”.
Në vitin 2018 Pagarusha u vlerësua me “Medaljen e Mirënjohjes” nga presidenti amerikan, Donald Trump.
Mirënjohja jonë për kontributin e saj në muzikën shqiptare do të jetë gjithnjë e madhe!
