Munich Airport International GmbH (MAI) ka vendosur të tërhiqet nga angazhimi i saj si konsulente në projektin e Aeroportit të Vlorës, pas një vale të gjatë kritikash nga organizatat mjedisore dhe institucione ndërkombëtare.
Vendimi u bë i ditur gjatë një mbledhjeje të Këshillit Bashkiak të Mynihut më 8 prill 2025, ku u shqyrtua një peticion që kërkonte tërheqjen e mbështetjes për projektin në fjalë. Gjatë diskutimeve, përfaqësuesit e MAI konfirmuan se kompania planifikon të përfundojë rolin e saj këshillues deri në fund të muajit prill.
Ky zhvillim vjen në vazhdën e shqetësimeve të ngritura në Shqipëri e jashtë vendit për ndikimin negativ që projekti i aeroportit do të ketë në zonën e mbrojtur të Vjosës, veçanërisht në Lagunën e Nartës, një vend me rëndësi të veçantë për migrimin ndërkombëtar të shpendëve.
Organizatat mjedisore gjermane, përfshirë EuroNatur dhe BUND, kanë qenë ndër më të zëshmet në denoncimin e këtij projekti, duke e cilësuar si një kërcënim të drejtpërdrejtë për biodiversitetin dhe ekosistemin unik të zonës.
Sipas medias gjermane, përfshirja e MAI në projekt është kritikuar edhe për shkak të mungesës së një vlerësimi të plotë dhe të pavarur të ndikimit mjedisor, gjë që konsiderohet si shkelje e standardeve ndërkombëtare për mbrojtjen e mjedisit. Këto shqetësime janë përforcuar nga reagimet e institucioneve evropiane, si Komisioni Evropian dhe Parlamenti Evropian, të cilat kanë kërkuar pezullimin e punimeve derisa të realizohet një vlerësim gjithëpërfshirës i ndikimit të projektit në mjedis.
Në këtë kontekst, roli i MAI si kompani në pronësi të Flughafen München GmbH – ku qyteti i Mynihut zotëron 23% të aksioneve – është vënë në qendër të vëmendjes. Aktivistët kanë ushtruar presion mbi autoritetet bashkiake të Mynihut që të ndërhyjnë për të ndalur mbështetjen ndaj këtij projekti kontrovers.
Kritikat ndaj projektit janë bërë gjithnjë e më të zëshme në mediat gjermane, të cilat pasqyrojnë jo vetëm kundërshtimin e organizatave mjedisore, por edhe rritjen e presionit ndërkombëtar për ruajtjen e zonave të mbrojtura natyrore në Shqipëri.
Tërheqja e MAI shënon një moment kyç në debatin për fatin e Aeroportit të Vlorës dhe përmban sinjale të qarta për nevojën e respektimit të standardeve mjedisore ndërkombëtare në projekte të tilla infrastrukturore, që po shkatërrojnë ekosistemin.
