Situata në sektorin e bujqësisë në qarkun e Elbasanit paraqitet mjaft e rëndë si pasojë e motit të keq.
Fermerët në zonat rurale të njësive administrative Orenj dhe Qukës në Prrenjas raportojnë dëme të mëdha në sipërfaqe të konsiderueshme tokash të mbjella, të prekura nga rënia e ndjeshme e temperaturave.
Sipas vlerësimeve paraprake, rreth 1500 hektarë janë dëmtuar si rezultat i ngricave, ku temperaturat kanë zbritur deri në -4 gradë Celsius.
Ndikimi më i madh është ndjerë në pemtari dhe vreshtari, sektorë që përbëjnë burimin kryesor të të ardhurave për shumë familje bujqësore në këtë zonë.
Përtej Prrenjasit, edhe në njësinë administrative Polis në Librazhd, reshjet e breshërit të regjistruara në fund të muajit mars kanë shkaktuar shkatërrime të plota të të mbjellave dhe drufrutorëve.
Fermerët e prekur janë në prag të falimentimit dhe shprehen se, deri tani, nuk kanë marrë asnjë mbështetje nga institucionet.
Mungesa e një reagimi të menjëhershëm dhe konkret nga autoritetet po shton pasigurinë në një sektor që prej vitesh përballet me sfida të vazhdueshme.
Pa ndërhyrje të shpejtë dhe ndihmë të drejtpërdrejtë financiare, shumë fermerë rrezikojnë të mos e rimëkëmbin dot aktivitetin e tyre për sezonin e ardhshëm.
