Anëtari i Kryesisë së Partisë Socialiste, Ditmir Bushati ka thënë se PS ka nevojë për t’u reformuar më tej dhe t’i bëjë të rinjtë të flasin. Në një intervistë për emisionin “Kjo javë” në News 24, Bushati tha se PS nuk është një forcë ku çdo gjë funksionon më së miri, duke mbajtur parasysh edhe sfidat e mandatit të tretë.
“Gara e PS duhet të jetë gjithmonë në raport me shoqërinë. Nevojë për t’u reformuar më tej, për të qenë një parti që do t’i bëjë të rinjtë të flasin. Nevoja për të parë përtej një 4-vjecari, duhet ta pozicionojë PS në një forcë avangarde për shoqërinë. Nuk është sot PS një forcë, ku çdo gjë funksionon më së miri, sepse mandati i tretë na ka sjellë në një sfidë tjetër”, tha Bushati.
Ai ka folur edhe për moskandidimin e tij në zgjedhjet e 25 prillit, gjë të cilën e quajti të padrejtë, por tha se kjo nuk e bën të heq dorë nga angazhimi në PS.
“Besoj se nuk ka diskutim që vota në Asamblenë Kombëtare ishte një lloj mbështetje për aktivitetin dhe kontributin tim, sepse PS ka investuar tek unë, siç jam përpjekur unë për të investuar dhe që do vazhdoj të jap kontributin tim në këtë forcë politike, pavarësisht funksioneve që do të mbaj ose jo. Sa i përket çështjes së kandidimit, e kam thënë që ka qenë një vendim i padrejtë në gjykimin tim, por kjo nuk më bën të heq dorë nga angazhimi im për PS dhe me PS”, u shpreh Bushati.
