Zv. kryetari i grupit të PS, Toni Gogu pas mbledhjes së Konferencës së Kryetarëve njoftoi se u vendos që të rrëzohej kërkesa e grupit parlamentar të PD për mocio me debat në lidhje me inceneratorët. Sipas tij nuk ka asgjë urgjente dhe se çështja e inceneratorëve i ka kaluar tashmë drejtësisë. Ai shtoi se urgjencën e çmuan kur ishte momenti për t’i hapur rrugën SPAK për arrestimin e Arben Ahmetj.
“Kryetarja e Kuvendit në zbatim të rregullores e nxitur nga një kërkesë e pakicës së pakicës për një mocion me debat ku ishte shtuar dhe fjala ‘urgjente’, u thërrit Konferenca dhe i kërkoi mendim për ta bashkuar dhe me një tjetër kërkesë, për interpelancë po urgjente. Kërkonin për të diskutuar çështjen e inceneratorëve. Ne i dhamë pëlqimin kryetares që meqë çështjet janë të ngjashme për tu bashkuar, por nuk dhamë pëlqimin që çështjet urgjente për t’u futur në Kuvend.
Në sesionin e të enjtes, do të vendosë Kuvendi nëse ato çështje do të përfshihen në rendin e ditës apo jo. Ne besojmë se aty nuk ka përmbajtje, tani është momenti i drejtësisë për atë çështje. Ne e kemi hapur rrugën kur ishte rasti urgjent dhe hapëm rrugën e SPAK”, tha ai për mediat.
