Taulant Balla doli mbrëmë në “Opinion” me një vetëbesim grotesk, duke u përpjekur të përdorë ChatGPT si argument juridik për të mbrojtur Belinda Ballukun. Në vend që të sqaronte qytetarët pse një zëvendëskryeministre nën hetim për manipulim të tenderëve strategjikë pezullohet nga gjykata, ai u hodh në lojë me një deklaratë që e fundos më shumë sesa e ndihmon:
“U tha nga bufi i PD-së se ka një rast të ngjashëm me këtë. Po të doni, hyni në ChatGPT dhe pyeteni “më gjej një rast ministri të pezulluar”. Kam gjetur vetëm rastin e një senatori në Parlamentin e Brazilit.”
Jo vetëm që kjo është e pavërtetë, por edhe demonstron një paaftësi të frikshme për të kuptuar si ligjin, si mjetet që përmend.
Sepse e vërteta është krejt tjetër. ChatGPT, brenda pak sekondash, liston një sërë rastesh të dokumentuara në dhjetëra vende, ku gjykatat kanë pezulluar ose shkarkuar ministra dhe kryeministra në detyrë. Rastet shkojnë nga Tajlanda te Malawi, nga Papua Guinea e Re te Izraeli, dhe po, edhe Shqipëria është pjesë e këtij realiteti juridik normal në demokracitë funksionale. Pa harruar se pikërisht ky mekanizëm ligjor, pezullimi i një ministri të dyshuar për korrupsion, është i parashikuar qartë edhe në Kodin e Procedurës tonë Penale.
Ndërkohë që Balla kërkon t’i shesë publikut idenë se “s’ka precedent”, lista është e gjatë dhe e pamëshirshme: kryeministre e pezulluar në Tajlandë, ministra të pezulluar në Tajlandë, ministrat e Papua Guinea e Re, ministri i Bujqësisë në Malawi, ministra të shkarkuar në Izrael, ish ministra të ndaluar të mbajnë funksione në Surinam, kryeministra të larguar nga gjykatat kushtetuese.
Nëse Balla do “mësime” nga ChatGPT, ja mësimi i parë: mos e përdor si alibi kur nuk e ke idenë as si funksionon, as çfarë thotë.
Dhe mësimi i dytë: mëso ligjin tënd para se të dalësh në televizion të mbrosh të pambrojturën. Sepse GJKKO nuk e pezulloi Belinda Ballukun se i erdhi në mendje, por sepse ligji e kërkon. Dhe kur një zëvendëskryeministre akuzohet për manipulime tenderësh, për korrupsion, për skema që SPAK i cilëson si të strukturuara, pezullimi është mbrojtje e shtetit nga abuzimi.
Dhe fundja, nëse Taulant Balla kërkon vërtet të dijë se çfarë thotë ChatGPT, përgjigjja është shumë më e thjeshtë se sa mendon: ka plot ministra të pezulluar në botë, ka plot të shkarkuar, ka plot të dënuar. Në këtë listë tashmë hyn edhe Shqipëria, jo për meritë të qeverisë, por për meritë të drejtësisë që ka filluar të çlirohet pak nga pak nga tutela politike.
Nëse ka një “buf” në këtë histori, nuk është ai që Balla imagjinon.
