Mjeku i Urgjencës Kombëtare Ilir Allkja rekomandon që pacientët me Covid të mos mjekohen në shtëpi. Sipas tij, janë dy arsyet kryesore që nuk ka më fluks të shtuar në spitalet Covid në Tiranë: trajtimi i pacientëve në spitalet rajonale nëpër rrethe dhe trajtimi i tyre në shtëpi.
Sipas mjekut Allkja kjo e fundit nuk është diçka pozitive pasi në shtëpi nuk mund t’i kesh të gjitha shërbimet. Po ashtu dhe trajtimi në ambulanca është problematik pasi dikush mund të dojë shërbime shtesë, çka ambulanca nuk i ofron.
Mjeku Allkja tha se ka parë raste kur një shtëpi kishte 4 familjarë me oksigjen dhe disa raste që janë për intubim kanë qenë me saturim në gjak nivel 44.
“Po, ka rënë presioni në spitalet Covid se nga rrethet nuk po vijnë më, po trajtohen atje, pra nuk transportohen. Gjë e mirë nuk është trajtimi i të sëmurëve në shtëpi. Në një shtëpi kam gjetur deri në 4 aparate oksigjeni, një infermiere që hyn dhe ju bën injeksione. Kjo nuk na bën krenarë përballë situatës. Këto raste janë për spital. Rastet e shtëpisë që transportojmë janë kandidatë për intubim, i kam gjetur edhe me saturim 44. Kam plot raste që firmosin shtrimin dhe thonë dua të vdes në shtëpi jo në spital. Për këtë e kanë fajin teoritë idiote që kanë dalë se gjoja në spital nuk të shërbejnë. Gjej rastin të përsëris dhe të them se të gjithë duhet të kenë besim tek mjekët” deklaroi Allkja.
/Gazetareforma.com/
